Չմոռանանք, որ խոսքը հազարավոր մարդկանց մասին է. Վահե Դավթյանը՝ «Գազպրոմ Արմենիայի» շուրջ ստեղծված իրավիչակի մասին

Գազի սակագինն ունի երեք բազային բաղադրիչ.

Գազի գինը սահմանին՝ 165 դոլար:

 

ԱԱՀ և մաքսային վճարներ՝ մոտ 42 դոլար:

 

«Գազպրոմ Արմենիայի» ծախսերն ու շահույթը՝ մոտ 50 դոլար:

 

Առաջին երկու բաղադրիչները հասկանալի պատճառներով առայժմ անփոփոխ են մնում:

Հետաքրքիր է երրորդի կառուցվածքը, որն իր մեջ ներառում է նյութական և վերանորոգման, ինչպես նաև վարչական ծախսերը, ամորտիզացիան և այլն: Սակայն առավել ուշագրավ հետևյալը. սակագնի վերջնական կառուցվածքում ընկերության աշխատավարձային ֆոնդը կազմում է 19,6 դոլար, գազի կորուստներինը՝ 11 դոլար:

 

Այսինքն, վերոնշյալ 50 դոլարի 60%-ը բաժին է ընկնում աշխատավարձերին ու գազի կորուստներին:

 

Ակնհայտ է, որ նման համակարգերում աշխատակիցների հաստիքացուցակը ձևավորվում է հստակ մեթոդաբանական հիմքերի վրա՝ ելնելով տվյալ երկրի գազատրանսպորտային ենթակառուցվածքների անվտանգ ու կայուն շահագործման նկատառումներից: Հետևաբար, ընկերության կոլեկտիվի կրճատման հարցն առայժմ պետք է դնել մի կողմ: Ամեն դեպքում, պետք փնտրել աշխատավարձային ֆոնդի կրճատման այլ տարբերակներ՝ խուսափելով սոցիալական ռիսկերից: Չմոռանանք, որ խոսքը հազարավոր մարդկանց մասին է:

 

Առավել հետաքրքիր են կորուստները, որոնք, չնայած ընկերության հսկայական ներդրումների, շարունակում են կրիտիկական կետում գտնվել: