Իմ նպատակը շատ պարզ է՝ հասցնել մեր հանրությանը իրական, հավաստի տեղեկություններ այն ռազմավարության մասին, որի ընթացքում մենք հաղթել ենք Ապրիլյան պատերազմում․ Սերժ Սարգսյան. Տեսանյութ

Համոզվեցի, որ իմ հանձնաժողովի նիստին մասնակցելու իմ որոշումն ամբողջովին արդարեցված էր: Նիստը նորմալ պայմաններում ընթացավ, փոխադարձ հարգանքի մթնոլորտում և ես շատ ուրախ եմ, որ կարողացա լրացուցիչ տեղեկություններ հայտնել ապրիլյան ռազմական գործողությունների մասին: Այս մասին այսօր լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ խոսելով ԱԺ-ում Ապրիլյան պատերազմի քննիչ հանձնաժողովի նիստի ընթացքի մասին: Հաղորդում է Tert.am-ը:

Երրորդ նախագահը ցավով նշեց, որ հնարավորություն չունի պատասխանել լրագրողների հարցերին, քանի որ այդ տեղեկություններն այնքան կարևոր էին, որ չի կարող ոտքի վրա խոսել այդ մասին: «Իմ նպատակը շատ պարզ է՝ հասցնել մեր հանրությանը իրական, հավաստի տեղեկություններ այն ռազմավարության մասին, որի ընթացքում մենք հաղթել ենք»:

«Երբ արտակարգ դրությունը կավարտվի, ես մանրամասն կպատասխանեմ ցանկացած հարցի՝ տրամաբանական, տեղի, թե անտեղի:  Ես չեմ ներքաշվելու այստեղ հարց ու պատասխանի մեջ: Ուղղակի ասեմ, որ ես երբեք չեմ ղեկավարվել դավադրությունների  տեսություններով, և ոչ էլ ենթարդրում եմ, որ մեր դաշնակիցները դավադրություններ են հյուսում հայ ժողովրդի շուրջ, չկա այդպիսի բան: Ակնհայտ է, որ մենք ունենք թշնամիներ, բայց և ունենք բարեկամներ, և բոլորին խորհուրդ եմ տալիս դավադրությունների տեսությունով չառաջնորդվել »,- ասաց նա:

Հիշեցնենք, որ այսօր ԱԺ մուտքի մոտ լրագրողների հետ զրույցում Սերժ Սարգսյանն ասել էր, որ ոչինչ չունի թաքցնելու և եկել է այն ժամանակը, երբ ինքը պատրաստ է պատասխանելու բոլոր հարցերին։ «Հարգելի լրագրողներ, ուզում եմ, որ դուք հավատացած լինեք, որ ես ձեզնից ավելի շատ եմ շահագրգռված շփվելու մեր լրատվամիջոցների հետ»,-նշեց նա:

Սերժ Սարգսյանը հայտնեց, որ դիմել է հանձնաժողովին՝ իր մասնակցությամբ նիստն անցկացնել արտակարգ դրության ավարտից հետո, բայց հանձնաժողովը նպատակահարմար է համարել նիստն անցկացնել ապրիլի 16-ին:

Մանրամասները՝ Tert.am-ի տեսանյութում