Վրաստանում 12-ամյա տղան վարակվել է կորոնավիրուսով

«Վրաստանում կորոնավիրուսով վարակված առաջին երեխայի վիճակը բավարար է: Նրա մոտ հիվանդությունն ընթանում է  ավելի մեղմ ձևով: Հուսով ենք, որ երեխան հիվանդությունը ծանր չի տանի, քան աշխարհի ցանկացած այլ երկրում»,- լրագրողներին ասել է Թբիլիսիի ինֆեկցիոն հիվանդանոցի տնօրեն Մարինա Էզուգբայան:

12-ամյա դեռահասը կորոնավիրուսով վարակվել է Իտալիա այցելած մորաքրոջից: Վերջին մի քանի օրը նա ընտանիքի մյուս անդամների հետ միասին գտնվել է տանը՝ կարանտինում:

Նրա խոսքով ՝ մինչ այս պահը կորոնավիրուսի վարակով 20 հիվանդ գտնվում է հիվանդանոցում:

«Մենք վարակի չորս աղբյուր ունենք` մեկը Իրանն է՝ 2 հիվանդ: Երկրորդ աղբյուրը Իտալիան է՝ վարակված հիվանդն ու  նրա հետ կապ հաստատած 5 անձինք: Երրորդ աղբյուրը կրկին Իտալիան է, նրանց հետ շփման մեջ գտնվող մարդիկ: Եվ չորրորդ աղբյուրը հիվանդ է` ժամանած Իսպանիայից»,- հայտնել է Էզուգբայը:

Վրաստանի իշխանությունները ձեռնարկում են արտակարգ միջոցառումներ` երկրում դադարեցվում են զանգվածային միջոցառումները, գրասենյակների մի մասն անցնում է հեռավար ռեժիմի, փակվում են դպրոցներն ու մանկապարտեզները, չեղարկվել է Չինաստանի, Իրանի և Իտալիայի հետ օդային հաղորդակցությունը: