Կառավարությունը հավանություն տվեց ապօրինի ծագման գույքի բռնագանձման օրինագծին

Կառավարությունը հավանություն տվեց «Ապօրինի ծագում ունեցող գույքի բռնագանձման մասին» օրենքի նախագծի և հարակից օրենքների նախագծերի վերաբերյալ Կառավարության օրենսդրական նախաձեռնությանը:

Արդարադատության նախարար Ռուստամ Բադասյանը նշեց, որ փաթեթով նախատեսվում են գործողություններ, որոնք թույլ կտան իրականացնել ակտիվների ուսումնասիրություն և հօգուտ պետության բռնագանձել օրենքի իմաստով չհիմնավորվող հարստությունը։

«Իրավասու մարմինը կգործի ՀՀ գլխավոր դատախազության կազմում։ Ուսումնասիրության համար հիմք կհանդիսանան որոշակի ազդակներ, մասնավորապես, որոշակի հանցագործությունների քրեական գործերի շրջանակներում ապօրինի ծագում ունեցող, այսինքն՝ օրինական եկամուտներով չհիմնավորվող գույքի առկայության տվյալները։ Իրավասու մարմինն իր լիազորությունների շրջանակներում կիրականացնի ուսումնասիրություն և առնվազն երեք տարվա ընթացքում կնախապատրաստի հայց ու կներկայացնի դատարան: Գույքը ենթակա է բռնագանձման, եթե հայցվորն ապացուցում է, որ պատասխանողին պատկանող գույքը օրենքով նախատեսված ծավալներով չի հիմնավորվում օրինական եկամուտներով։ Այսինքն՝ սա պետության ապացուցման բեռն է»,- ասաց նախարարը։

Փոխվարչապետ Մհեր Գրիգորյանը հարցրեց՝ արդյոք միայն պաշտոնատար անձի գույքի ծագմամբ են հետաքրքրվելու իրավապահները, թե դա վերաբերում է նաև օտարերկրյա ներդրողներին։ Արդարադատության նախարար Ռուստամ Բադասյանը պատասխանեց՝ հանցագործության դեպք, ազդակներ պետք է լինեն, ինչից հետո միայն իրավապահները կարող են զբաղվել։ 

Մհեր Գրիգորյանը հետաքրքրվեց՝ ինչ է լինելու, եթե ապօրինի գույքը կրիպտոարժույթ է, օֆշորային ընկերության գույք կամ ինչով է օրենքն օգնելու արտասահման տարված ակտիվները վերադարձնելուն։ Նա մտավախություն հայտնեց, որ ապօրինի ծագման գույքի բռնագանձումը կարող է արդիական չլինել։ 

Ի պատասխան՝ Բադասյանը շեշտեց՝ եթե քրեական գործ է հարուցվում, ձեռք է բերվում տվյալ, որ իքս պաշտոնատար անձը օֆշորային երկրում ունի անշարժ  գույք, որը գրանցված է այլ անձի անունով, համապատասխան մարմինները կդիմեն միջազգային փոխօգնության, ապացույց կհավաքվի, կներառվի փաստացի գույքի ծավալում ու կպահանջվի տեղեկություն դրա օրինական ծագման մասին, եթե չտրամադրվի՝ բռնագանձման առարկայի մեջ կներառվի։ 

Քննարկում ծավալվեց նաև, թե ինչ վաղեմության գործեր են ընդգրկվելու այս մեխանիզմի ներքո։ 

Վարչապետ Նիկոլ Փաշինյանը փորձում էր ստանալ պատասխան, թե ինչու են օրենքի նախագծում ֆիքսել տասը տարվա վաղեմությունը, մանավանդ, որ նշված ժամկետի սահմանումը կարող է ունենալ քաղաքական ենթատեքստ։ «Տասը տարվա չափը հիմնված է երկու փաստարկի վրա՝ մեկը, որ ապացույցների պահպանվածության հարց կա»,- պատասխանեց արդարադատության նախարարը։ Փաշինյանի պնդմամբ, սակայն, վաղեմության ժամկետ սահմանվեց 1991 թվականը։ 

Zham.am