Նիկա Գվարամիա. Իվանիշվիլիին վարկաբեկող ձայնագրությունները պահվում են Երևանում

Վրաստանի նախկին վարչապետ, միլիարդատեր Բիձինա Իվանիշվիլիին վարկաբեկող ձայնագրությունները պահվում են Երևանում: Երեքշաբթի երեկոյան նման հայտարարությամբ հանդես եկավ ընդդիմադիր «Ռուսթավի 2» հեռուստաընկերության տնօրեն Նիկա Գվարամիան։ Փոխանցում է «Ազատությունը»:

Նրա խոսքով՝ այդ ձայնագրությունների գոյության և դրանց գտնվելու վայրի մասին իրեն պատմել է Վրաստանի գլխավոր դատախազի նախկին տեղակալ Լաշա Նացվլիշվիլին՝ առաջարկելով գնել դրանք:

«Նա ինձ ասաց, որ այդ նյութերը պահ է տվել Երևանում, այնտեղ բնակվող իր ընկերոջ տանը: Օրենքի խախտմամբ կատարված այդ ձայնագրություններում, Նացվլիշվիլիի խոսքով, Բիձինա Իվանիշվիլիի զրույցների ձայնագրություններն են: Նա ինձ առաջարկեց գնել դրանք՝ նշելով նաև գինը` մի քանի միլիոն դոլար», - հայտարարում էր «Ռուսթավի 2» հեռուստաընկերության տնօրենը` հավելելով, թե Իվանիշվիլիին վարկաբեկող այդ տեղեկությունները չէր կարող ձեռք բերել, քանի որ այդքան գումար չուներ:

Ծագած այս սկանդալի ֆոնին Նիկա Գվարամիան հայտարարում է, որ պատրաստ է ներկայանալ դատախազություն և մանրամասնորեն պատմել, թե ինչպես է Նացվլիշվիլին կարողացել նախկին վարչապետին վարկաբեկող գաղտնի ձայնագրություններով հատել հայ-վրացական սահմանը` դրանք տեղափոխելով Երևան:

Գլխավոր դատախազի նախկին տեղակալ Նացվլիշվիլին, սակայն, կտրականապես հերքում է իրեն ներկայացվող մեղադրանքները: Ֆեյսբուքի իր էջում նա գրել է. - «Լրատվամիջոցները խնդրում են ինձ մեկնաբանել այդ մեղադրանքները: Բայց ինչպե՞ս է հնարավոր մեկնաբանել զառանցանքը: Դա ոչ միայն անպատվաբեր է, այլև արդյունավետ չէ զուտ բժշկական տեսանկյունից»։

Մանրամասները՝ «Ազատությունում»: