Հայաստանը կարողացավ տարածաշրջանի համար լրացուցիչ լարվածություններ չստեղծելով համատեղել ինտեգրացիոն գործընթացները
«Ռուսաստանում հասկանում են, որ վերջին 10 տարվա ընթացնքում չեն կարողացել հանդես գալ Հայաստանի զարգացման դոնոր, հետևաբար՝ Հայաստանին անհրաժեշտ են ընդլայնված հնարավորություններ: Այդ իսկ պատճառով Ռուսաստանում տոլերանտ են վերաբերվում այն փաստին, որ Հայաստանն ունի հարաբերություններ ԵՄ-ի հետ՝ փորձելով զարգացման ռեսուրս ստանալ այնտեղ: Եթե Ռուսաստանը դեմ է դրան, ապա պետք է որևէ կերպով փոխհատուցի այդ ուրվագծում տեղի ունեցած կորուստները: Իսկ քանի որ մենք չենք տեսնում որևէ փոխհատուցման փորձեր, ինչպես նաև Հայաստանի և ԵՄ-ի միջև հարաբերություններին դեմ ուղղված որևէ հայտարարություններ, ապա, կարծում եմ, ոչ մի նորություն չարժե սպասել», - Հայ-Ռուսական համալսարանում «Հայաստանի կողմից երկու ինտեգրացիոն վեկտորների համադրում. ԵՄ հետ համագործակցության հեռանկարներն ու դժվարությունները ԵԱՏՄ անդամակցության պայմաններում» խորագրով կլոր սեղանի ընթացքում հայտարարել է քաղաքագետ, «Կովկաս» ինստիտուտի փորձագետ Հրանտ Միքայելյանը՝ պատասխանելով այն հարցի՝ արդյո՞ք ԵՄ-ի հետ կնքած Խորը և համապարփակ գործընկերային համաձայնագիրը չի կարող բացասական ազդեցություն թողնել Ռուսաստանի և Հայաստանի միջև հարաբերությունների վրա:
Նա նաև հավելել է, որ այն բոլոր բացասական մեկնաբանությունները, որոնք հնչել են ռուսաստանյան հեռուստաեթերից, առանձին անձանց բացասական կարծիքները՝ կապված ԵՄ-ի հետ պայմանագրի ստորագրման հետ, պետք չէ լուրջ ընդունել, քանի որ դրանք պարտադիր չէ, որ արտահայտում են Ռուսաստանի իշխանությունների պաշտոնական դիրքորոշումը:
«Ռուսաստանում մեդիայի և քաղաքականության հարաբերությունները կառուցված են այլ կերպ, քան հաճախ թվում է: Այնպես չէ, որ նախագահի աշխատակազմից զանգում են բոլոր հեռուստաալիքներ և ասում. «Դուք ասում եք սա, իսկ դուք՝ սա»», - ասաց փորձագետը:
«Հայացք» կիրառական քաղաքականության և հետազոտությունների վերլուծական կենտրոնի փորձագետ Աննա Կարապետյանն էլ, իր հերթին, հավելել է, որ այն փաստը, որ Հայաստանը՝ լինելով ԵԱՏՄ անդամ-պետություն, կարողացավ ԵՄ-ի հետ պայմանագիր կնքել, տարածաշրջանում գլոբալ ընկալումներ փոխեց:
«Ընկալումներ փոփոխվեցին թե՛ մեր երկրի ներսում, և թե՛ հենց ԵՄ-ի և ԵԱՏՄ-ի մոտ: Եվ այն հանգամանքը, որ թե՛ ԵՄ-ի կողմից, և թե՛ Ռուսաստանի բարձրաստիճան պաշտոնյաների կողմից բարձր գնահատվեց այն փաստը, որ Հայաստանը կարողացավ անցնցում կերպով, տարածաշրջանի համար լրացուցիչ լարվածություններ չստեղծելով համատեղել երկու ինտեգրացիոն գործընթացները, ցույց է տալիս, որ կողմերը դրական գնահատական են տալիս այդ երևույթին», - ասաց Ա. Կարապետյանը:
Zham.am
Հետևեք մեզ Facebook-ում