ԵՄ-ի հետ վիզային ազատականացված ռեժիմը կարող է գործել միայն 2021 թ-ից

Հունիսի 7-ին Հայ-Ռուսական համալսարանում տեղի է ունեցել «Հայաստանի կողմից երկու ինտեգրացիոն վեկտորների համադրում. ԵՄ հետ համագործակցության հեռանկարներն ու դժվարությունները ԵԱՏՄ անդամակցության պայմաններում» խորագրով կլոր սեղան, որը կազմակերպվել է «Հանրային դիվանագիտության կենտրոնի» ՀԿ-ի կողմից՝ ՀՌՀ Ազգային անվտանգության ոլորտում ռազմավարական ուսումնասիրությունների լաբորատորիայի աջակցությամբ:

Անդրադառնալով Հայաստան-ԵՄ վիզային ռեժիմի ազատականացման հարցին, քաղաքագետ Էմիլ Օրդուխանյանը կարծիք է հայտնել, որ մինչև Հայաստանում ներքաղաքական գործընթացները տրամաբանության տեսանկյունից չընկնեն հունի մեջ, դժվար է խոսել իրատեսական հեռանկարների մասին:

«Մենք այսօր ունենք ԱԺ, որտեղ վերադասավորումներ են տեղի ունենում, սակայն այդ վերադասավորումները, ըստ էության, արհեստական են, քանի որ ժողովրդի կամահայտության արդյունք չեն. մեծամասնությունը դառել է փոքրամասնություն և այլն», - ասաց Օրդուխանյանը՝ նշելով, որ վիզային ռեժիմի ազատականացման հեռանկարների հիմնավոր հիմքերի մասին կարել է խոսել միայն անցնցում խորհրդարանական ընտրություններից հետո:

«Հայացք» կիրառական քաղաքականության և հետազոտությունների վերլուծական կենտրոնի փորձագետ Աննա Կարապետյանն, իր հերթին, նշեց, որ ի սկզբանե կար որոշակի թյուրըմբեռնում, որ համաձայնագրի կնքումը միանգամից կհանգեցնի նաև վիզային ռեժիմի ազատականացմանը, սակայն կարևոր է գիտակցել, որ դա երկու առանձին գործընթացներ են:

«Վիզային ռեժիմի ազատականացման շուրջ երկխոսությունը Հայաստանի և Եվրամիության միջև ֆորմալ բանակցությունները դեռևս մեկնարկած չեն: Ի սկզբանե Հայաստանի առջև որոշակի պահանջներ են դրվել, ինչպես և «Արևելյան գործընկերության» մյուս երկրների առջև, որոնք Հայաստանն այս պահի դրությամբ բավարարել է: Եվ այսօրվա դրությամբ ԵՄ-ի կողմից այդ ազատականացման շուրջ երկխոսության հետաձգումը ավելի շատ կապում են ԵՄ-ում տեղի ունեցող ներքին գործընթացների հետ, քանի որ Սիրիական ճգնաժամից հետո ԵՄ անդամ-երկրներում կային որոշակի վախեր՝ կապված միգրացիոն հոսքերի հետ, հատկապես որ «Արևելյան գործընկերության» մյուս երկրների՝ օրինակ, Վրաստանի հետ, ԵՄ-ն խնդիրներ ունեցավ, քանի որ ազատականացումից հեոտ միգրանտների հոսքն զգալիորեն աճել է, և ԵՄ երկների մոտ մտավախություններ առաջացան, որ վիզաների ազատականացումն արևելյան երկների հետ դեռևս վտանգավոր է, քանի որ տնտեսությունների մակարդակի բավականին մեծ տարբերություն կա», - նշեց Ա. Կարապետյանը:

«Կովկաս» ինստիտուտի փորձագետ Հրանտ Միքայելյանի կարծիքով՝ վիզային ռեժիմի ազատականացման գործընթացի ձգձգման հարցում անհրաժեշտ է մի շաքր խնդիրներ առանձնացնել.

«Առաջինը՝ ԵՄ որոշ երկրների դիրքորոշումը: Այնպես, օրինակ, Ֆրանսիան չի ուզում դա, քանի որ վախենում է Հայաստանից միգրանտների ներհոսքից: Այնպես, օրինակ, Վրաստանի պարագայում մշակվել է հատուկ դրույթ, որը հնարավորություն է տալիս չեղարկել վիզային ազատականացված ռեժիմը բազմաթիվ խախտումների և ԵՄ ցանկության պարագայում: Նմանատիպ մեխանիզմը մշակվելու է նաև Հայաստանի պարագայում: Բացի այդ, վիզային ազատականացված ռեժիմի ընդունման համար բարեփոխումների փաթեթ է համաձայնեցվելու: Անհրաժեշտ է նաև հաշվի առնել այն, որ գործընթացը երկարատև բնույթ է կրում: Այսինքն՝ եթե, օրինակ, աշնանը սկսվել այդ բանակցությունները, ապա կարելի է ակնկալել, որ այն կսկսի գործել միայն 2021 թ-ին», - ասաց Միքայելյանը՝ հավելելով, որ ԵՄ-ն հնարավոր է ակտիվացնի Հայաստանի հետ իր համագործակցությունը, ինչը պայամանավորված է այն հանգամանքով, որ ԵՄ-ում կարծում են, որ Հայաստանի նոր իշխանություններն աջակցության անհրաժեշտություն ունեն:

Zham.am