Ճիշտը «Ուժեղ Հայաստան»-ի կողմից մանդատների վերցնելն է. Նարեկ Կարապետյան

«Ազգային ժողով գնալու, թե չգնալու մասին որոշումն ընդունելուց առաջ քննարկել ենք երկու սցենար»,- ասում է «Ուժեղ Հայաստան» կուսակցության  խորհրդի անդամ, «Ուժեղ Հայաստան» դաշինքի պատգամավորի թեկնածու Նարեկ Կարապետյանը։

Նա նշում է, որ մեկ սցենարով գնում են ԱԺ և ունենում են օրենսդիրում ներկայացվածություն, չեն գնում և չեն ունենում ներկայացվածություն։

«Նայեցինք փողոցային պայքարի տարբերակը. եթե 70-80 հազար մարդ է հայտնվում փողոցում, այդ պարագայում մենք ԱԺ-ում չէինք ունենում գրեթե մեկ պատգամավոր, որը կքվեարկեր մեր բերվող փոփոխության օգտին։ ՔՊ-ի և ընդդիմության ձայների համամասնության տարբերությունն այնքան շատ էր, որ գործնակում անհնար էր հասնել օրենսդիրի միջոցով իշխանափոխության փողոցային պայքարի արդյունքում։ 

Եթե գնում ենք օրենսդիր և չի լինում փողոցային պայքար, այդ ժամանակ գրեթե անհնար է բանակցային պրոցեսների միջոցով իշխանական պատգամավորներին բերել այն կարծիքի, որ պետք է փոփոխություն։ Այդ իսկ պատճառով մենք եկանք մի կարևոր եզրահանգման՝ որպեսզի կարևոր փոփոխություն տեղի ունենա Հայաստանում, երկու կարևոր բան է  պետք՝ փողոցային պայքար և Ազգային ժողովում ընդդիմության մեծ ներգրավածություն։ Այս համակցությունը կբերի մեծ փոփոխության։

Իհարկե, դա պետք է լինի մեկ անգամ, մեկ օր և վերջնական։ Մենք չենք պատրաստվում մարդկանց հրավիրել փողոց այն ժամանակ, երբ մեծ փոփոխության հնարավորություն չենք տեսնում, պատրաստվում ենք մարդկանց հրավիրել փողոց այն ժամանակ, երբ կտեսնենք փոփոխության մոտ հնարավորություն։ Օրենսդիրի և փողոցի համակցության արդյունքում կունենանք լեգիտիմ, խաղաղ փոփոխություն։ 

Այսպիսով, մենք եկանք մի հայտարարի, ճիշտը մեր կողմից, մեր ուժի կողմից մանդատների վերցնելն է, ներկայացվածությունն է Ազգային ժողովում, որպեսզի ապահովվենք այն ներկայությունը, որը վաղը կաջակցի նաև փողոցային պայքարին»։ 

 Նա նշում է, որ մանդատներ վերցնելը չի նշանակում ԱԺ-ում այս համամասնության լեգիտիմության ճանաչում.  ««Քաղաքացիական պայմանագիրը» ներկայացված է  ավելի շատ ներկայացուցիչներով, քան պետք է լիներ եթե լինեին օրինական, արդար ընտրություններ։ Մենք չենք ճանաչում ՔՊ-ի ներկայացվածության թվաքանակը, ներկայացվածությունն Ազգային ժողովում  այս կազմով, սա ընտրախախտումների հետևանք է։ Ուզում եմ մեր հայրենակիցներին վստահեցնել՝ մեր սկսած գործն ավարտին ենք հասցնելու։

Մենք պետք է կտրենք ՔՊ-ի թևերը Հայաստանով մեկ, որպեսզի հնարավորություն չունենան ամեն գյուղում, քաղաքում ճնշման ենթարկել մեր հայրենակիցներին իրենց արդար որոշման համար։ Սա կբերի շատ ավելի դրական լուծումների հետագա պրոցեսների ժամանակ՝ արտահերթ և հերթական ընտրությունների ժամանակ։

Մենք կսկսենք պայքարել բոլոր այն ուղղություններով, որոնք կօգնեն մեզ սահմանափակել ՔՊ իշխանությունը, որպեսզի գործիքակազմերը, որոնք ունեին այս ընտրության ժամանակ կատարելու ընտրակեղծիք, այլևս չօգտագործեն։ Երկարաժամկետ առումով մեր երկիրն ունեի մեծ մարտահրավերներ, դրանց դեմ կանգնելու համար մեզ պետք է փոխել այսօրվա իշխանությունը։

Մեր սկսած գործը մենք հասցնելու ենք ավարտին»։ 

Հիշեցնենք՝ 9-րդ գումարման ԱԺ-ում ներկայացված կլինեն երեք խմբակցություն.

1. «Քաղաքացիական պայմանագիր» կուսակցությունը` 64 պատգամավոր,

2. «Ուժեղ Հայաստան» դաշինք` 29 պատգամավոր,

3. «Հայաստան» դաշինք` 12 պատգամավոր»

Մանրամասն՝ տեսանյութում։