«Հայաստանի քաղաքացիների ձայները գողացվել են». Մամիջանյանի ելույթը ԵԽԽՎ-ում (տեսանյութ)

ԱԺ «Պատիվ ունեմ» խմբակցության պատգամավոր Հայկ Մամիջանյանը Եվրոպայի խորհրդի խորհրդարանական վեհաժողովում (ԵԽԽՎ) ունեցած ելույթում հայտարարել է, որ Հայաստանում ժողովրդավարությունը լուրջ վտանգի տակ է՝ վարչապետ Նիկոլ Փաշինյանին մի քանի անգամ անվանելով «դիկտատոր»։ 

Նա, մասնավորապես, նշել է. «Այսօր ուզում եմ խոսել ժողովրդավարության մասին և նույնիսկ ձեզ հետ փոքրիկ վիկտորինա խաղալ։

Ինչպե՞ս կկոչեիք այն քաղաքական գործչին, որը քաղաքացիներին զրկում է իրենց հիմնարար իրավունքից՝ ընտրելու իրավունքից։ Պատասխանը՝ դիկտատոր։

Իսկ ինչպե՞ս կկոչեիք այն քաղաքական գործչին, որը ամեն օր ձերբակալում է իր քաղաքական ընդդիմախոսներին։ Նկատի ունեմ բառացիորեն՝ ամեն օր որևէ այլախոհ ձերբակալվում է իր կարծիքն արտահայտելու համար։ Կարծում եմ՝ այս հարցի պատասխանը նույնպես ակնհայտ է․ դիկտատոր։

Կամ ինչպե՞ս կկոչեիք մի պաշտոնյայի, որն իրեն պահում է այնպես, կարծես միաժամանակ վարչապետն է, ոստիկապետը, գլխավոր դատախազը, գլխավոր դատավորը և նույնիսկ հավակնություններ ունի ղեկավարելու եկեղեցին։ Այստեղ նույնպես պատասխանը մեկն է՝ դիկտատոր։

Ճնշում պետական հատվածի աշխատակիցների նկատմամբ, օրենքի ընտրովի կիրառում, մինչդատական կալանքի չափազանց մեծ կիրառություն, քաղաքական դրդապատճառներով ոստիկանության չարաշահումների անբավարար քննություն և դատական իշխանության անկախության թուլացում։ Սրանք ԵԱՀԿ դիտորդական առաքելության՝ Հայաստանի խորհրդարանական ընտրությունների վերաբերյալ նախնական զեկույցի ձևակերպումներն են։

Սակայն ես չեմ անդրադառնա բոլոր խախտումներին, որովհետև դրանցից մեկն առանձնահատուկ է։ Այս ամսվա՝ 2026 թվականի ընտրություններում հազարավոր ընտրողներ զրկվեցին իրենց ընտրական իրավունքից, քանի որ երեք ընտրատեղամասերում ընտրությունների արդյունքները պարզապես անվավեր ճանաչվեցին։ Չնշանակվեց կրկնակի քվեարկություն, թեև օրենքն ուղղակիորեն պահանջում էր դա։

Փաշինյանի իշխանությունը պարզապես անտեսեց օրենքի հստակ պահանջը։ Եվ դա կարևոր է, որովհետև արդյունքում ընդդիմադիր կուսակցություններից մեկը ընդամենը մի քանի հարյուր ձայնի պակասով չհաղթահարեց անցողիկ շեմը։ Այդ ձայները պարզապես խլվեցին նրանցից։

Այս բոլոր խախտումները կատարվեցին, որպեսզի իշխող կուսակցությունն ապահովի խորհրդարանում 3/5 մեծամասնություն։  Հայաստանի ժողովրդի ձայները գողացվել են։

Վերջին հինգ տարիների ընթացքում այս ամբիոնից ես խոսել եմ Լեռնային Ղարաբաղի հայերի իրավունքների, Ալիևի ռեժիմի իրականացրած ագրեսիայի ու հանցագործությունների, ադրբեջանական բանտերում պահվող իմ հայրենակիցների, անհետ կորածների ճակատագրի, Հայաստանի օկուպացված տարածքների և բազմաթիվ այլ հարցերի մասին։

Այսօր Արցախում այլևս ոչ մի հայ չի մնացել։ Եվ այսօր ես կրկին խոսում եմ իմ երկրում մարդու իրավունքների կոպիտ խախտումների մասին։ Հույս ունեմ, որ միջազգային կազմակերպություններն այս անգամ ավելի արագ կարձագանքեն, քան նախկինում, քանի դեռ այդ խախտումների դեմ բարձրաձայնողներն իրենք չեն հայտնվել բանտերում։

Նույնիսկ եթե Եվրոպան հանդուրժի ևս մեկ հետխորհրդային բռնապետի, մենք՝ Հայաստանի ժողովուրդը, դա չենք հանդուրժի։ Շնորհակալություն»։