Սուտն ու կեղծիքը դարձել են այս իշխանության այցեքարտերը․ Արեգնազ Մանուկյան (տեսանյութ)

Մեր երկրի թիվ մեկ խնդիրն անվտանգությունն է, երաշխավորված խաղաղության ապահովումը: Կարևոր է նաև սոցիալ-տնտեսական խնդիրների լուծումը: Այս մասին «Մայր Հայաստան» կուսակցության համաժողովում ասել է «Մայր Հայաստան» կուսակցության վարչության անդամ Արեգնազ Մանուկյանը։

«Այս իշխանությունները մարդկանց բազում խոստումներ տվեցին ու խաբեցին: Սուտն ու կեղծիքը դարձել են այս իշխանության այցեքարտերը:

Խաբում են բոլոր հարցերում: Խաբում են, թե, իբր, խաղաղություն են բերել, թե, իբր, մարդկանց սոցիալական վիճակը լավացրել են, թե, իբր, բիզնեսը զարգանում է, թե, իբր, թալան ու կոռուպցիա չկա:

Սրանք միտումնավոր մեր երկիրը թողել են առանց դաշնակիցների ու ժամանակավոր հրադադարը ներկայացնում են որպես խաղաղություն, Հայաստանի միակողմանի զիջումները հրամցնում են որպես հաղթանակ:

Արցախը դավաճանաբար հանձնեցին՝ դա ներկայացնելով որպես Հայաստանի ինքնիշխանության ապահովում և Ադրբեջանի պահանջած այսպես կոչված «Զանգեզուրի միջանցքը» չտալու գին, բայց հա՛մ Արցախը հանձնեցին, հա՛մ միջանցքն են տվել:

Այսպես շարունակվելու դեպքում մենք պետականություն կարող ենք կորցնել:

«Մայր Հայաստանի» թիմն ունի լուծումներ անվտանգային, սոցիալ-տնտեսական և հանրային համերաշխության ապահովման հետ կապված: Մեր քաղաքական ուժի առաջնորդ Անդրանիկ Թևանյանը բազմիցս ներկայացրել է մեր գաղափարներն ու ծրագրերը: Դրանք առաջիկա ընտրությունների ժամանակ առավել հանգամանալից կներկացավեն ՀՀ քաղաքացիներին»,-ասել է Արեգնազ Մանուկյանը: