Մսամթերքն ու կաթնամթերքը շարունակել են թանկանալ. գնային փոփոխությունները՝ դեկտեմբերին

2025 թվականի դեկտեմբերին Հայաստանում սննդամթերքի և ոչ ալկոհոլային խմիչքների գները 2024 թվականի դեկտեմբերի համեմատ աճել են 4.3%-ով, իսկ 2025 թվականի նոյեմբերի համեմատ՝ 2.9%-ով։ Այս մասին Panorama.am-ը տեղեկանում է ՀՀ վիճակագրական կոմիտեից։ Գնաճ արձանագրվել է հանրապետության բոլոր դիտարկվող բնակավայրերում, առավել բարձր՝ Երևանում։

Մսամթերքի շուկայում գրանցվել է զգալի թանկացում։ Թռչնամսի գինը տարեկան կտրվածքով աճել է 4.3%-ով։ Տավարի միսը թանկացել է 11.7%-ով, խոզի միսը՝ 12.7%-ով, գառան միսը՝ 14.1%-ով։ Միայն մեկ ամսում՝ նոյեմբերից դեկտեմբեր, մսամթերքի գների աճը կազմել է 0.8–7.4%։

Տարվա ընթացքում թանկացել են նաև հիմնական ալյուրային և ձավարեղենային ապրանքները։ Ձավարը թանկացել է 2.6%-ով, հացը՝ 3.6%-ով, հաճարինը՝ 4.1%-ով, մակարոնեղենը՝ 7.9%-ով, հնդկացորենը՝ 9.4%-ով, ոլոռը՝ 10.4%-ով։ Դեկտեմբերին՝ նախորդ ամսվա համեմատ, այս ապրանքների գների աճը կազմել է 0.1–1.3%։

Ձկան շուկայում «իշխան» տեսակի ձկան գինը 2025 թվականի դեկտեմբերին 2024 թվականի դեկտեմբերի համեմատ աճել է 18.3%-ով, իսկ մեկ ամսում՝ 5.3%-ով։ Կաթնամթերքի խմբում կարագի և մարգարինի գները տարեկան աճել են համապատասխանաբար 7.2% և 7.4%։ Պանրի գինը բարձրացել է 4.6%-ով, թարմ կաթինը՝ 4.7%-ով։ Ձվի գինը տարվա ընթացքում աճել է 7.2%-ով, իսկ միայն մեկ ամսում՝ 4.3%-ով։

Սուրճի գները տարեկան կտրվածքով աճել են 9.5%-ով, իսկ կակաոյինը՝ 31.9%-ով։ Հրուշակեղենի գների աճը կազմել է 2.4%։ Շաքարի և շաքարավազի ապրանքախմբում գրանցվել է 1.1% տարեկան և 1.4% ամսական գնաճ։

Ալկոհոլային խմիչքների գները 2025 թվականի դեկտեմբերին նախորդ տարվա նույն ամսվա համեմատ աճել են 5.5%-ով, իսկ ծխախոտինը՝ 8.7%-ով։ Մեկ ամսում ալկոհոլային խմիչքները թանկացել են 1.2%-ով, ծխախոտը՝ 0.1%-ով։

Բանջարեղենի շուկայում տարեկան կտրվածքով արձանագրվել է 7.5% գնանկում, սակայն միայն մեկ ամսում՝ նոյեմբերից դեկտեմբեր, գները աճել են 12.5%-ով։

Ընդհանուր առմամբ, 2025 թվականի վերջին Հայաստանում սննդամթերքի շուկայում պահպանվել է գնաճային ճնշումը՝ առավել արտահայտված մսամթերքի, կաթնամթերքի և որոշ հիմնական ներմուծվող ապրանքների հատվածում։
Աղբյուրը` Panorama.am