Հուսով ենք, որ Ձեր միջնորդությամբ Ղարաբաղի հայերը կվերադառնան իրենց պատմական հայրենիք. Վ. Բալասանյանի նամակը Վ. Պուտինին

«Հուսով ենք, որ Ձեր միջնորդությամբ  Ղարաբաղի հայերը՝ Հայրենական մեծ պատերազմում հաղթանակած ժողովրդի ժառանգները, կվերադառնան իրենց պատմական հայրենիք»,-Հայրենական պատերազմում տարած հաղթանակի 80-ամյակի կապակցությամբ ՌԴ նախագահ Վլադիմիր Պուտինին ուղղված բաց նամակում նշել է Արցախի հերոս, գեներալ-մայոր Վիտալի Բալասանյանը։

Ծավալուն նամակում նա հիշեցրել է, թե ինչ դեր են ունեցել արցախցիները  Հայրենական մեծ պատերազմում, նշել Չարդախլու հայտնի գյուղի մասին, որ երկու մարշալ է տվել՝ Հովհաննես Բաղրամյանն ու Համազասպ Բաբաջանյան։

«Զարմանալի փաստ է, բայց աշխարհում չկա որևէ այլ բնակավայր, նույնիսկ մեկ մեծ քաղաք, որը միանգամից երկու մարշալ տար։ Բայց Ղարաբաղի Չարդախլու գյուղը տվեց՝ Խորհրդային Միության մարշալ Իվան Բաղրամյանին և զրահատանկային ուժերի գլխավոր մարշալ Համազասպ Բաբաջանյանին։ Չարդախլու գյուղում ծնվել է նաև 2 մարշալ, 12 գեներալ, 199 մարդ դարձել է սպա, որոնցից 57-ը՝ գնդապետ, 7-ը՝ Խորհրդային Միության հերոս»,-նշել է Բալասանյանը։

Նա նաև հույս է հայտնել, որ Վ. Պուտինի միջնորդությամբ  հնարավորինս շուտ կձեռնարկվեն գործնական քայլեր՝ հազարամյակների ընթացքում ստեղծված պատմական և մշակութային ժառանգությունը, այդ թվում՝ եկեղեցիները, խաչքարերը, տարբեր շենքեր, բնակավայրերը, հուշարձանները, այդ թվում՝ Հայրենական մեծ պատերազմին նվիրված հուշարձանները փրկելու համար։

«Ամփոփելով՝ թույլ տվեք արտահայտել մեր հարգանքն ու երախտագիտությունը, շնորհավորել Ձեզ Հայրենական մեծ պատերազմում տարած հաղթանակի 80-ամյակի մեծ տոնի կապակցությամբ և մաղթել հարատև խաղաղություն ամբողջ աշխարհում։ Հայրենական մեծ պատերազմին մասնակցած արցախցիների սերնդի անունից»,-նշել է Բալասանյանը։
Աղբյուրը` Panorama.am