Արարատ Միրզոյանը պետք է դադարեցնի բանակցությունները և վերադառնա․ Մետաքսե Հակոբյան

Մինչ Վաշինգտոնում խաղաղության պայմանագիրն է քննարկվում, Ադրբեջանն Արցախում էսկալացիայի է դիմում։ Tert.am-ի հետ զրույցում նման տեսակետ հայտնեց Արցախի ԱԺ «Արդարություն» խմբակցություն քարտուղար Մետաքսե Հակոբյանը։

Արցախցի պատգամավորի համոզմամբ՝ նման դեպքում, երբ ադրբեջանական կողմը սադրանքի է դիմում, ՀՀ արտաքին գործերի նախարար Արարատ Միրզոյանը պետք է դադարեցնի բանակցությունները և վերադառնա։

«Այս իրավիճակում նման օրակարգից խոսելն ամոթ է։ Լավ հիշում ենք, երբ նախորդ տարվա դեկտեմբերին պետք է տեղի ունենար արտաքին գործերի նախարարների եռակողմ հանդիպումը, Արարատ Միրզոյանը չներկայացավ՝ պատճառաբանելով Արցախի շրջափակումը։ Եթե այն ժամանակ ԱԳ նախարարը հումանիտար հարցերի քնարկումով պայմանավորված հանդիպման չի մասնակցել, հիմա առավել ևս չպետք է մասնակցի, երբ բանակցությունների ֆոնին կողմերից մեկը մյուսի նկատմամբ պատերազմական գործողություններ է իրականացնում, որի հետևանքով կան զոհեր»,- նկատեց Հակոբյանը։

ԱԺ «Արդարություն» խմբակցություն քարտուղարի կարծիքով՝ խաղաղության օրակարգի շուրջ չպետք է լինեն բանակցություններ, երբ մի կողմը փաստացի ագրեսիայի է դիմում և 7 ամիս շարունակ հումանիտար ճգնաժամ է ստեղծել Արցախում։

«Ինչի նրանք պատերազմական զոհե՞ր չեն, որ մահացել են շրջափակման ընթացքում, որովհետև իրենց պատշաճ բժշկական օգնություն չի ցուցաբերվել։ Նման դեպքում խաղաղության օրակարգից չեն խոսում, իսկ ո՞րն է խաղաղության օրակարգի այլընտրանքը։ Ես միշտ ունեմ այդ հարցի պատասխանը․ խաղաղության օրակարգի այլընտրանքն ուղղակի այդ օրակագը չունենալն է»,- ասաց նա։

Խորհրդարանականը դարձյալ բոլոր ուշադրությունը հրավիրում է Արցախում ստեղծված հումանիտար ճգնաժամի վրա՝ ընդգծելով, որ այն գնալով սրվում է։

Տոտալ շրջափակման պայմաններում Արցախում կոմունիկացիաները պարալիզացված են՝ տեղաշարժվելու հնարավորությունները խիստ սահմանափակված են։

Մետաքսե Հակոբյանը մանրամասնեց, որ տրանսպորտային միջոցները քիչ քանակությամբ են աշխատում՝ դիզելային վառելիքի դեֆիցիտի պատճառով։ Շատերը Ստեփանակերտում միայն ոտքով են տեղաշարժվում։

Մեր զրուցակցի փոխանցմամբ՝ պարենային լուրջ խնդիրներ էլ են առաջացել․ խանութներում արդեն իսկ առաջին անհրաժեշտության ապրանքներն սպառվել են։

«Ամենօրյա օգտագործման ապրանքները գրեթե իսպառ բացակայում են։ Մրգեր, բանաջարեղեն չկան Արցախում։ Շատ քիչ քանակությամբ միայն տեղացիներն են արտադրում, բայց դրանք մայրաքաղաք կամ այլ շրջաններ տեղափոխման խնդիրներ ունեն։ Գներն էլ սարսափելի են, հասարակ մարդիկ չեն կարողանում մրգի և բանջարեղենի երես տեսնել։ Քիչ թե շատ դեղերի հարցն է միայն կարգավորվել՝ շնորհիվ Կարմիր Խաչի»,-ներկայացրեց նա։

Հիշեցնենք, որ հունիսի 28-ին՝ ժամը 01:30-ից, Ադրբեջանի ԶՈՒ ստորաբաժանումները հրետանային միջոցներից կրակ են բացել Մարտունու և Մարտակերտի հայկական դիրքերի ուղղությամբ` կիրառելով նաև ԱԹՍ-ներ, հայկական կողմն ունի 4 զոհ:

Արցախցի պատգամավորի տեղեկացմամբ՝ այսօրվա 4 զոհերից 2-ը Մարտունուց են, մյուս 2-ը՝ Մարտակերտից։ Զոհվածներից մեկի հայրն էլ 1992 թվականի պատերազմում էր զոհվել։