Ռուս խաղաղապահները դեղորայք ու սնունդ են հասցրել Լիսագոր
Լիսագորում հիմնական խնդիրը սնունդն ու դեղորայքն է։ Ռուս խաղաղապահներն օրեր առաջ սնունդ հասցրել են, բայց իրավիճակը նույնն է, ճանապարհի մասով բան չի փոխվել։ Այս մասին այսօր MediaHub-ի հետ զրույցում ասաց Լիսագոր գյուղի վարչական ղեկավար Գագիկ Նասիբյանը։
«Մենք հիմա որևէ ճանապարհ չունենք Ստեփանակերտ կամ այլ գյուղեր գնալու համար։ Գումարի հետ կապված իրականում մեծ խնդիր չկա, եթե գումար էլ լինի, ծախսելու որևէ տեղ չունենք, բանկոմատ չկա, որ գումար կանխիկացնենք, բայց սա մեզ համար առաջնային չէ։ Կապի խնդիրն է մեծ»,-ասաց նա։
Ասում է՝ գյուղում ծանր հիվանդներ չկան, սակայն գյուղում դեղորայքի խնդիր էր առաջացել, որը վերջին օրերին կարգավորվել է։
«Այս ամսվա ընթացքում, երևի թե, կհերիքի մեր ունեցած պաշարը»,-ասաց նա։ Նասիբյանի խոսքով՝ ամեն դեպքում համայնքում վախի մթնոլորտ կա։ Այն լիսագորցիները, որոնք Գորիսում էին մնացել, վերադարձել են, սակայն հիմա անցակետով անցնողներ չկան, քանի որ իրավիճակն անկանխատեսելի է։
Հիշեցնենք, որ ապրիլի 23-ին ադրբեջանական կողմն Արցախում, Հակարի գետի կամրջի մոտ ապօրինի անցակետ է տեղադրել, որի արդյունքում ամբողջությամբ կտրվել է Հայաստան-Արցախ կապը։
Ըստ այդմ, արդեն տաս օրից ավելի է, ինչ ադրբեջանական կողմն արգելել է առողջական ծանր վիճակում գտնվող քաղաքացիների տեղափոխումը Արցախից Հայաստան, անգամ՝ Կարմիր խաչի միջնորդությամբ: Ավելին, արգելվել է նաեւ ցանկացած տեսակի ապրանքի ներմուծումն Արցախ:
Հետևեք մեզ Facebook-ում