Շուշիի շրջափակված գյուղերն առաջիկա րոպեներին կստանան Ստեփանակերտից ուղարկված սնունդն ու դեղորայքը

Այս պահին Ստեփանակերտից Շուշիի շրջանի՝ Մեծ Շեն, Հին Շեն, Եղցահող և Լիսագոր գյուղերի բնակիչներին օգնություն է հասցվում։ Այս մասին 24News-ի հետ զրույցում նշեցին շրջափակված համայնքների ղեկավարներրը։

Մեծ Շենում իրավիճակը նորմալ է, ասաց համայնքի ղեկավար Դավիթ Դավթյանը։ «Արցախի իշխանությունների կողմից օգնության ենք սպասում այս պահին։ 10-15 րոպեից կհասնեն։ Սնունդ, դեղորայք են բերելու»։

Հին Շենի ղեկավար Սամվել Սարգսյանն էլ նշեց, որ ուղարկվող օգնությունը մի ամսվա կտրվածքով պետք է որ իրենց բավարարի։

Եղցահողի համայնքապետ Արտակ Հակոբյանի խոսքով, այս պահին ամեն ինչ էլ կա գյուղում․«էս պահին սնունդի խնդիր չկա, բայց բերում են։ Կոմբիկերի խնդիր կար, բայց էսօր 7․5 տոննա օգնություն են բերել»։

Լիսագորում ևս նույն խնդիրներն են, ինչ մյուս երկու համայնքներում։ «Անասնակերի, սննդի և դեղորայքի խնդիր կար, բայց մի քիչ հետո գնալու ենք Ստեփանակերտից եկած օգնությունը ստանանք»,- ասաց համայնքի ղեկավար Գագիկ Նասիբյանը։

Հիշեցնենք, որ ապրիլի 23-ից ադրբեջանական կողմը Հակարիի կամրջի վրա ապօրինաբար տեղադրել է անցակետ, այդպիսով երկկողմանի շրջափակման մեջ թողնելով Շուշիի շրջանի Մեծ Շեն, Հին Շեն, Եղցահող և Լիսագոր գյուղերը, կտրելով կապը Հայաստանի և Ստեփանակերտի միջև։