Թշնամին ներխուժել է Սյունիք. Քարտեզ

«Հայկական ալիքը» գրում է. «Դեռևս հունվար ամսին «Հայկական ալիք»-ն իր հետևորդների համար պատրաստել և ներկայացրել էր քարտեզ, որտեղ ակնառու կերպով երևում է ադրբեջանական շրջափակման քաղաքականության հետագիծը: Քարտեզն ուշադիր ուսումնասիրելու պարագայում ակնհայտ է դառնում, որ ադրբեջանական զորքերի ներխուժումը ՀՀ սուվերեն տարածք բնավ պատահական վայրերում չէ տեղի ունեցել, այլ հատուկ ընտրված ռազմավարական կարևորության տեղանքներում:

Քարտեզում Մեղրիից Նոյեմբերյան կապող գիծը ցույց է տալիս Ադրբեջանի ներխուժումների շարունակականության պարագայում կորսվելիք տարածքներն ու մեզ համար ռազմավարական կարևորության Հայաստան-Իրան և Հայաստան-Վրաստան ճանապարհների հայտնվելը ադրբեջանական վերահսկողության տակ: Հենց դրան է միտված Ադրբեջանի` Սյունիքը անեքսիայի ենթարկելու և, այսպես կոչված, նախկին անկլավների «փոխանակաման» ծրագրերը: 

Քարտեզ պատրաստելու գաղափարն առաջացավ Արցախի շրջափակումից մեկ ամիս անց: Նպատակն էր հանրությանը հնարավորինս մատչելի կերպով ցույց տալ, թե ինչ ճակատագիր է սպասվում ՀՀ-ին Արցախն Ադրբեջանին հանձնելուց հետո. Հայաստանի տոտալ շրջափակում, կենսական ճանապարհների վերահսկում և անհրաժեշտության պարագայում այդ ճանապարհները փակելով ՀՀ-ն անհրաժեշտ ռեսուրսների մատակարարումից զրկում:

Հիմա տեսնում ենք, որ Ադրբեջանը կրկին ներխուժել է ՀՀ սուվերեն տարածք, այս անագմ Սյունիքից, իսկ ավելի կոնկրետ` Տեղ գյուղից: Ինչպես հայտնի է, 2023 թ.-ի ապրիլի 1-ից պետք է գործեր Արցախ տանող այսպես կոչված այլընտրանքային ճանապարհը: Իսկ մինչ այդ Գորիս-Ստեփանակերտ ճանապարհը պիտի անցներ Տեղ-Կոռնիձորի կամուրջ հատվածով` արդեն նոր ճանապարհով հասնելով Մեծ Շեն։ 

Չսպասելով ապրիլի 1-ին՝ ադրբեջանական զինուժն առաջ է եկել, վերցրել Տեղ-Կոռնիձորի կամուրջ ճանապարհի՝ ժամանակավորապես օկուպացված Քաշաթաղի շրջանի տարածքում գտնվող հատվածը և ներխուժել Տեղ գյուղի վարչական տարածք՝ խորանալով 100-300 մետր, որոշ տեղեկություններով՝ մոտ 1 կիլոմետր։

Ըստ այդմ, «Հայկական ալիք»-ը պատրաստել է նոր քարտեզ, որտեղ պատկերված են մեր նոր տարածքային կորուստները: Ընդ որում, քարտեզում կարող եք տեսնել մեր արևելյան սահմանի երկայնքով 2020 թ.-ի նոյեմբերի 9-ից ի վեր ունեցած բոլոր տարածքային կորուստները, այդ թվում նաև Սյունիքի մարզի նոր տարածքային կորուստներն ու Արցախի տոտալ շրջափակմանը միտված ադրբեջանական քաղաքականության հետագիծը:

Ի՞նչ է ստացվում. ՀՀ դե-ֆակտո իշխանությունները, շատ լավ իմանալով այս պայմանավորվածության մասին, չեն նախապատրաստվել Տեղ-Կոռնիձորի կամուրջ հատվածի պաշտպանությանը: Ավելին, վերջիններս մինչ օրս ոչինչ չեն արել ադրբեջանական զորքերը ՀՀ տարածքից դուրս բերելու համար, քանի որ որոշել են գնալ «էսկալացիա թույլ չտալու» ճանապարհով: 

Վերջին ակորդն էլ դարձավ ՀՀ դե-ֆակտո իշխանությունների որոշումը առնվազն Տեղ-Կոռնիձոր հատվածից հանել ՀՀ բանակը և նրա տեղը ԱԱԾ սահմանապահներ տեղակայելը։

Կարո՞ղ ենք ակնկալել, որ սա կանաչ լույս է ադրբեջանական բանակի համար, որպեսզի շարունակեն իրենց օկուպացիոն քաղաքականությունը. ԱՅՈ՛: Անու՞մ են որևէ բան դե-ֆակտո իշխանությունները ՀՀ տարածքային ամբողջականությունը պահպանելու, վերականգնելու և սահմանամերձ գյուղերի բնակիչների անվտանգությունն ապահովելու համար. Ո՛Չ: Միակ բանը, որ անում է դե-ֆակտո խունտան, 3 օր անընդմեջ կեղծ օրակարգեր դաշտ նետելն է, հանրության ուշադրությունը շեղելը և հերթական ծածկադմփոցը, որում դիրիժորի փայտիկն իր ձեռքն է վերցրել ՀՀ դե-ֆակտո ԱԱԾ-ը»։