Թուրք ընդդիմադիր գործիչը ձերբակալվել է՝ Էրդողանին վիրավորելու մեղադրանքով

Թուրքիայում ձերբակալվել է ընդդիմադիր «Ժողովրդահանրապետական» կուսակցության (ԺՀԿ-CHP)՝ Քյութահյա նահանգի Հիսարլըք շրջանի տարածքային կառույցի նախագահ Ռեջեփ Օնլուն։ Թուրքական «Sözcü» թերթի կայքի տեղեկացմամբ՝ Օնլուն մեղադրվել է սոցցանցերում նախագահ Ռեջեփ Թայիփ Էրդողանի հասցեին վիրավորական հրապարակումներ կատարելու մեջ։

ԺՀԿ Քյութահյայի տարածքային կառույցի նախագահ Զելիհա Աքսազ Շահբազը քննադատել է Օնլուի ձերբակալության փաստը՝ ուշադրություն հրավիրելով այն հանգամանքի վրա, որ որպես ընդդիմադիր գործիչ նա լիովին իրավասու է քաղաքական քննադատության ենթարկելու իշխանության ներկայացուցչին և դա չպետք է գնահատվի որպես վիրավորանք։ 

«Որպես գլխավոր ընդդիմադիր կուսակցություն՝ մեր կուսակցության ներկայացուցիչների և կառույցների պարտականությունն է վերահսկել իշխանությանը։ «Հանրապետության նախագահին վիրավորելու» մեղադրանքը օգտագործվում է որպես գործիք՝ հասարակական և քաղաքական ընդդիմությանը ճնշելու և լռեցնելու համար։ հարյուրավոր ձերբակալությունների և կալանավորումների միջոցով հասարակությունը ճնշվել է, հաստատվել է ավտորիտար, բռնատիրական ռեժիմ», -ասել է Շահբազը։
Նա նշել է, որ իր կուսակցությունը մերժում է այդ մեղադրանքները, չի ընկճվելու իշխանության ճնշումների ու լռեցնելու փորձերի պատճառով և շարունակելու է պայքարը երկրում կրկին ժողովրդավարություն և ազատություն հաստատելու համար։

Աղբյուր` Ermenihaber.am