Վրացական ընդդիմությունն արգելափակել է խորհրդարանի աշխատանքը մինչեւ Սաակաշվիլիի ազատ արձակումը

Վրաստանի ամենամեծ ընդդիմադիր կուսակցությունը՝ «Միացյալ ազգային շարժումը», հրաժարվել է աշխատել երկրի խորհրդարանում, հայտնում է «Գռուզիա.Online»-ը։ Ինչպես հայտնել է կուսակցության ներկայացուցիչ Նիկա Օբոլաձեն, պատգամավորները լքում են խորհրդարանական աշխատանքը, քանի դեռ չի լուծվել երկու հիմնական հարց՝ նախկին նախագահ Միխեիլ Սաակաշվիլիի ազատ արձակումը եւ սահմանադրական փոփոխությունները։

«Մենք կասեցնում ենք խորհրդարանի աշխատանքը, բայց մանդատները թողնելը հետաձգվում է։ Քանի դեռ այս հարցերը չեն լուծվել։ Այժմ մենք կենտրոնանում ենք լայնածավալ բողոքի ցույցերի վրա, որպեսզի դրանք սուր լինեն եւ ի վերջո ստիպեն կառավարությանը հաշվի առնել մեծամասնության կամքը երկիրը կառավարելիս»,- ասել է Օբոլաձեն։

Նրա խոսքով` կուսակցությունը պատրաստվում է խորհրդակցել Սաակաշվիլիի հետ մանդատների պահպանման հարցի շուրջ, ուստի «Միացյալ ազգային շարժման» անդամները ցանկանում են այցելել քաղաքական գործչին բանտում։

Աղբյուր՝ News.am