Էրդողանը հայտնել է, որ Փաշինյանից դրական ազդակներ է ստանում

Թուրքիայի նախագահ Ռեջեփ Թայիփ Էրդողանը ԱՄՆ-ից Թուրքիայի վերադարձին ավանդական դարձած հարցազրույց է տվել իրեն ուղեկցող թուրք լրագրողներին։

Թուրքիայի արտաքին և ներքին օրակարգին վերաբերող հարցերի շարքում Էրդողանն անցել է նաև Հարավային Կովկասում ստեղծված իրավիճակին։

Նշելով, որ Ադրբեջանում ինտենսիվ աշխատանքներ են տարվում՝ Էրդողանը հետևյալ շեշտադրումներն է արել․ «Օրինակ՝ պարոն Ալիևն ուզած պահին, ուզածի պես հանգիստ զանգում և խոսում է պարոն Պուտինի հետ։ Ես էլ նույն կերպ․․․ Շատ կարճ ժամանակահատվածում կարողանում եք կապը հաստատել և շփվել»։

Շարունակելով իր միտքը Թուրքիայի ղեկավարը նշել է, որ այս պահին կարևոր խնդիրների շարքում Իգդիրց դեպի Ադրբեջան ճանապարհաշինությունն է։ Հույս է հայտնել, որ իրենց կհաջողվի կառուցել նաև երկաթգիծ։

«Այս ճանապարհի կառուցումը շատ-շատ կարևոր քայլ է լինելու։ Մեր կողմից հնգամյակ կամ վեցամյակ կոչվող նախագիծ կար։ Հիմա այս հարցի վերաբերյալ էլ Փաշինյանից դրական ազդակներ են գալիս։ Այդ դրական ազդակների հետ միասին որոշ քայլեր ենք անելու։ Ամսվա վերջում պարոն Պուտինի հետ կայանալիք հանդիպմանը այս հարցերն էլ, բնականաբար, լինելու են քննարկումների օրակարգում»,- մանրամասնել է Էրդողանը։