Խաղաղությունն այսպես է մեզ մատուցվելու՝ մաս-մաս մեր հայրենիքից կտորներ պոկելով

Նախորդ օրվանից Երասխում եւ տարբեր սահմանային հատվածներում թշնամին կրակում է, հրետակոծում։ Երասխի գյուղապետն էր նախորդ գիշեր վիրավորվել։ 

Այդ իրադարձությունները «Հրապարակ»-ի խնդրանքով մեկնաբանեց  ՀՀ ԶՈւ գլխավոր շտաբի նախկին պետ, նախկին ռազմական տեսուչ Մովսես Հակոբյանը։

- Ինչո՞ւ է Ադրբեջանը հենց Երասխի եւ Գեղարքունիքի դիրքերի ուղղությամբ միաժամանակ, նույն գիշերը կրակ բացում, մենք ի՞նչ ակնկալենք։ 

- Ամբողջությամբ իրավիճակին չեմ տիրապետում, դրա համար չեմ կարող ասել։

- Չեմ հավատում, որ չեք էլ հետեւում։ 

- Հետեւում եմ, բայց լրատվամիջոցներից գիտեմ։ Օֆիցիալ որեւէ տեղեկություն չկա։ 

-Օֆիցիալը, օրինակ, այն է, որ Գեղարքունիքում մերոնք ընդհանրապես չեն կրակել։ Այսինքն՝ մենք դիմադրություն ցո՞ւյց ենք տալիս, թե՞ ոչ, Ձեր կարծիքով, եւ սա ի՞նչ է նշանակում՝ այս նոր էսկալացիան։ 

- Գլոբալ առումով, որպեսզի հասկանանք, թե ինչ է կատարվում, պետք է անդրադառնանք նոյեմբերի 10-ին ստորագրած փաստաթղթին՝ Ալիեւի եւ Փաշինյանի կողմից, եւ թե ինչ է դա ենթադրում, պիտի անդրադառնանք վարչապետի խոսքին՝ որ այն փաստաթուղթը, որը պատրաստվում է, Հայաստանի շահերից է բխում, եւ մենք դա ստորագրելու ենք։ Այսինքն՝ սա այդ փաստաթղթի կյանքի կոչելու ձեւն է։

- Բայց եթե ստորագրում է, էլ ադրբեջանցիներն ինչո՞ւ են կրակում։

- Որպեսզի հասարակությանը պատրաստեն, որ մեզ պատերազմ պետք չէ։ Ավելի լավ է երկարաժամկետ խաղաղություն ունենանք։ Իսկ այդ խաղաղությունն այդպես է մեզ մատուցվելու՝ մաս-մաս մեր հայրենիքից կտորներ պոկելով։

-Պարոն Հակոբյան, Ձեր կարծիքով, այս պահին ճիշտը պատասխան տա՞լն է ադրբեջանական կրակահերթերին։

- Ես չեմ կարող ասել՝ ինչ կլինի, որովհետեւ չեմ տիրապետում իրավիճակին։ Իսկ ավելի մանրամասն, եթե դուք նայեք, թե Երասխի որ հատվածում է պատերազմը գնում, եւ ինչ է կատարվում այնտեղ, դուք կհասկանաք, որ սահմանազատման գործընթացն Ադրբեջանն իր համար արդեն սկսել է։

- Նկատի ունեք, որ Տիգրանաշենի անկլավը վերցնո՞ւմ են։

- Այդ հատվածն անկլավին չի վերաբերում, մի քիչ ուրիշ բան է։ Ավելի հստակ՝ այդ տարածքը, որտեղ այսօր կռիվ է գնում, նախիջեւանյան համազորային հրամանատարի սեփականությունն է։ Նրան ասել են՝ սա քո սեփականությունն է, տիրապետիր։ Վկայականը ձեռքն է։

- Եվ այդ հողը վերցնում է իրե՞ն։ Հենց այդպե՞ս, ֆեոդալական սկզբունքո՞վ։

- Նա կադաստրային վկայական ունի, որ այդ տարածքը, որտեղ կրակոցները գնում են, իր սեփականությունն է։