Սուտ, սարքած փուչիկ ա. ամեն ինչ պարզ կլինի, ժողովուրդ ջան. Գագիկ Ծառուկյան

Օրվա կադրը. «Մուլտի գրուպի» սեփականատեր, ԲՀԿ նախագահ, նաև իր բարեգործություններով հայտնի, հաղթանդամ Գագիկ Ծառուկյանը դուրս է գալիս «հարկ վճարողների բաժնից»՝ շրջապատված քպ-ական աած-ականների «մարտիկներով», որոնք իրենց հանդերձավորմամբ հիշեցնում են մուլտֆիլմերի «նինձյա-կրիաներին»: 
Գագիկ Ծառուկյանն ինքնավստահ է, ժպտում է, ասում այն, ինչ ի սկզբանե էլ ակնհայտ էր. «Սուտ, սարքած փուչիկ ա»: Խոսքը նրան վերագրվող փաշինյանական մեղադրանքներն են: Այնքան մտացածին, որ սկսում ես կասկածել. դրանք իրավաբաննե՞ր են շարադրել, թե՞ ընտանեկան թերթի խմբագիրը: 

Ու չնայած տեսարանի աբսուրդայնությանն ու զավեշտական լինելուն, իրավիճակը ու միջավայրը, որի մեջ ընկղմվում է Հայաստանը, առավել քան ողբերգամղձավանջային է. այդպիսին են «թվային ժամանակաշրջանի» տոտալիտար ռեժիմները. ծաղրանմանակային, զավեշտական, բայց նույնքան անհոգի ու անմարդկային: 
Իսկ Հայաստանը ընկղմվում է գաղջ բռնատիրության ճահիճը, որտեղ չկա, չի գործում ոչ մի իրավունք, ոչ մի օրենք, ոչ մի չգրված օրենք, որտեղ կա միայն մեկ անհավասարակշիռ, բոլորին սպանել, կալանավորել, ունեզրկել սպառնացող անձնավորության քմահաճույք: 
Այդ միջավայրի ամբողջ ողորմելիությունն այն է, որ այսօր մեծահարուստ անձնավոության վրա իշխանության հարձակմամբ հրճվող իշխանամերձ, անգամ իշխանական սուբյեկտները չեն էլ կասկածում, որ վաղը, մյուս օրը, արդեն իրենց են բռնադատելու, բայց այդ ժամանակ ոչ միայն տեսախցիկներ ու լրագրողներ չեն լինելու (նրանք վաղուց համակենտրոնացման ճամբարներ քվշած կլինեն), այլև չի լինելու որևէ մեկը, որ հօգուտ իրենց կես ծպտուն հանի: Մարդկությունն արդեն տեսել է նման պատկերներ, և ոչ մեկ անգամ: 

Մանրամասն՝ 168.am-ի տեսանյութում: