Մի խոսքով. Սահմանամերձ Ճամբարակում կայացավ բռնցքամարտի բաց առաջնություն. բրոնեժիլետ սահմանի վրա
Մոտ մեկ տարի առաջ սահմանամերձ Ճամբարակ համայնքում բացվել էր բռնցքամարտի խմբակ, որտեղ հաճախում էին 118 երեխաներ:
Այսօր Ճամբարակում գործում է բռնցքամարտի մարզադպրոց, որտեղ էլ օրերս տեղի է ունեցել դպրոցի առաջին տարելիցին նվիրված բռնցքամարտի ավանդույթ դարձած բաց առաջնությունը:
Ճամբարակում հատկապես կարևորում են սպորտի դերը երեխաների առօրյայում` թե նրանց կոփելու, թե համակարգչից կտրելու և իրական կյանքին մերձեցնելու հարցում:
Անթիվ խնդիրների, բազում չլուծված հարցերի հետ մեկտեղ այստեղ չեն դադարում մարզումները:
Օրերս կայացած բռնցքամարտի բաց առաջնությունը այստեղ մեծացող երեխաների ու նրանց ծնողների արիության, ուժի, բարության, սիրո, իրենց հող ու ջրին նվիրավածության ամենավառ ապացույցն է:
Ասացեք` սահմանամերձ, ասացեք` Ճամբարակ, փնտրեք տեսանյութերում կգտնեք գյուղն էլ , երեխաներին էլ, պայմաններն էլ, ուսուցիչներին էլ, կմոռանաք արտարժույթի կուրսի մասին, երգող, չերգող նախագահների մասին էլ, կայացած ու չկայացած հանդիպումների մասին էլ, գոլֆ խաղացողների ու նորաբաց շքեղ առևտրի կենտրոնների մասին էլ, գոնե մի պահ կմոռանաք:
Ճամբարակի բաց առաջնության մասին պատկերացում կազմելու համար բավական է տեսնել մասնակից երեխաների ոգևորությունը, պատրաստվածությունը, պրոֆեսիոնալիզմը:
Փնտրեցեք մի տեղ ինտերնետում կտեսնեք, Ճամբարակցի տղաների մայրերը ասում են` բա մենք զինվոր ենք աճացնում, ուժեղ պետք է լինեն. աստված չանի, կարող է նաև ձեռնամարտ պետք գա, պետք է տիրապետեն... հացի հոտ է գալիս էդ մայրերի խոսքից, էկրանից հացի հոտ է գալիս, նրանց անխնամ, անկրեմ, անշրթներկ դեմքը իրենց տուն - գյուղի բրոնեժիլետն է:
Առաջնությանը մասնակցել է նաև Իջևանից ժամանած բռնցքամարտիկների խումբը, որտեղ 34 կգ քաշային կարգում առաջին տեղը զբաղեցրել է Հարություն Ղևոնդյանը: Նա մասնակից շատ երեխաներից մեկն է, նրա հետ մեկ երկու բառ փոխանակելուց հետո կհասկանաք, թե սահմանամերձ այս շրջանում ոգու ինչ արիութուն ունեն երեխաները: Ինչ իսկական են, ... կհասկանաք բոլոր այն մեծերին, այդ երեխաների հայրերին ու մայրերին, որ մնացել են սահմանին կպած, առանց կյանքի, առօրյայի որևէ բարելավման, որևէ առավելության, .. երեխաները ձեզ կօգնեն, որ հասկանաք:
Մի խոսքով, Ճամբարակում անցկացվել է բռնցքամարտի բաց առաջնություն:
Ինտերնետում փնտրեցեք` Ճամբարակ, սահման, գյուղ, խանութ, կենցաղ, երեխաներ.....
Zham.am