Իջևանը` Հայաստանի Հանրապետության 2018 թվականի երիտասարդական մայրաքաղաք
Այսօր ՀՀ սպորտի և երիտասարդության հարցերի նախարարությունում տեղի ունեցավ 2018 թվականի «ՀՀ տարվա երիտասարդական մայրաքաղաք» մրցույթի արդյունքների ամփոփումը:
ՀՀ սպորտի և երիտասարդության հարցերի նախարարի տեղակալ, մրցույթի կազմկոմիտեի նախագահ Արսեն Քարամյանը, ողջունելով ներկաներին, շնորհակալություն հայտնեց ՀՀ 2018 թվականի երիտասարդական մայրաքաղաք կոչմանը հավակնող ՀՀ Գեղարքունիքի մարզի Գավառ, ՀՀ Տավուշի մարզի Իջևան և ՀՀ Վայոց ձորի մարզի Ջերմուկ քաղաքներին՝ մրցույթին մասնակցելու, պատշաճորեն ու պատասխանատու կերպով իրենց քաղաքները ներկայացնելու համար:
Համաձայն մրցույթի կանոնակարգի, բոլորի ներկայությամբ, ամփոփվեցին հայտերի sms քվեարկության և փորձագիտական գնահատման արդյունքները, որոնց համադրմամբ ամենաբարձր միավորներ ստացած Իջևան քաղաքը ճանաչվեց մրցույթի հաղթող և հռչակվեց 2018 թ. ՀՀ երիտասարդական մայրաքաղաք:
Արսեն Քարամյանը շնորհավորեց Իջևան քաղաքի ներկայացուցիչներին 2018 թ. ՀՀ երիտասարդական մայրաքաղաք հռչակվելու առիթով և հույս հայտնեց, որ «ՀՀ տարվա երիտասարդական մայրաքաղաք» ծրագիրը հատկապես կնպաստի քաղաքների միջև հորիզոնական կապերի, երիտասարդական նախաձեռնողականության և երիտասարդական քաղաքականության ոլորտում բարեխիղճ և գործընկերային հարաբերությունների զարգացմանը:
Հանդիպմանը ներկա էին հայտատու քաղաքների ներկայացուցիչներ, մրցույթի փորձագիտական հանձնաժողովի և կազմկոմիտեի անդամներ:
ՀՀ սպորտի և երիտասարդության հարցերի նախարարություն