Նորից բանավեճի մասին
ՆՈՐԻՑ ԲԱՆԱՎԵՃԻ ՄԱՍԻՆ
Լսում եմ «Երկիր Մեդիա» ալիքով «Երկրի հարցը» հաղորդումը։ Աննա Իսրայելյանի հյուրը իրավաբան Արամ Օրբելյանն է։ Քննարկման մեկ հատվածը ՀՀ Գլխավոր շտաբի պետի շուրջ ստեղծված իրավական խնդիրն էր։ Աննա Իսրայելյանը, ի հակադրություն Արամ Օրբելյանի փաստարկների, բերեց այլ իրավաբանների, օրինակ Նորայր Նուրիկյանի տարբերվող կարծիքը։
Եվս մեկ անգամ բարձրացնում եմ հետևյալ, իմ կարծիքով հույժ կարևոր հարց, ուղղված ոչ միայն հեռարձակվող հեռուստաալիքներին, այլև քաղաքական գործիչներին, նաև իրենց քաղաքականապես չեզոք համարող իրավաբաններին․
Հեռուստաալիքների տնօրեններին, հարցազրուցավարներին․
-Հանրությանը հուզող տարբեր քաղաքական, իրավական հարցերի շուրջ, ինչու՞ բանավեճի չեք հրավիրում տարբեր կողմերին։
Քաղաքական գործիչներին և իրավաբաններին․
-Պատրա՞ստ եք հրապարակային բանավիճել ձեզ հետ տրամագծորեն այլ կարծիք ունեցող ձեր գործընկերների հետ։
Կուզենայի, որ սխալված լինեմ, բայց համոզված եմ, որ բանավեճից խուսափում են, ինչպես իշխանամետ լրատվամիջոցները, այնպես էլ իշխանության և մերձիշխանական գործիչներն ու իրավաբանները։Իհարկե, հեշտ է դեմքի անիմաստ, բայց «խելոք» արտահայտությամբ զազրախոսել, այպանել ընդդիմախոսներին, բայց միակողմանի, առանց փաստերի և տրամաբանության։
Բազմիցս շեշտել եմ, որ ինքս պատրաստ եմ ցանկացած բանավեճի, այն թեմաների շուրջ, որոնց մասին հրապարակային հայտնել եմ իմ տեսակետը։
Ավետիք Իշխանյանի ֆեյսբուքյան էջից