Ներե՛ք մեզ, որ թեև կյանքներս անգամ չխնայեցինք հայրենիքի ու մեր սրբությունների համար, բայց չկարողացանք պարգևել ձեզ խաղաղ երկիր. Քաջարանի համայնքապետի ուղերձը
Քաջարան համայնքի ղեկավար Մանվել Փարամազյանի ուղերձը Կանանց միջազգային տոնի առթիվ
Սիրելի՛ տիկնայք, օրիորդներ, հայո՛ց մայրեր, շնորհավորում եմ բոլորիդ Կանանց միջազգային տոնի առթիվ, մաղթում այն բերկրանքը, սերն ու երջանկությունը, որ Աստված վերապահել է միայն գեղեցիկ սեռին։ Աշխարհի բոլոր կանանց շնորհավորում ու մեծարում են տոնի առթիվ, բայց ի՞նչ խոսքերով մեծարել ու շնորհավորել հայ կանանց ու մայրերին...
Ձեր կերպարի առջև խամրում են բոլոր բառերը։ Խոնարհվում ենք ձեր առաջ, հա՛յ մայրեր, զինվոր ծնած ու սնած քաջասի՛րտ մայրեր, մեր սուրբ նահատակների սրբասու՛րբ մայրեր, երիցս խոնարհվում ենք։ Ներե՛ք մեզ, որ թեև կյանքներս անգամ չխնայեցինք հայրենիքի ու մեր սրբությունների համար, բայց չկարողացանք պարգևել ձեզ խաղաղ երկիր, անամպ երկինք, անարցունք աչքեր։ Ներեցե՛ք մեզ որ չկարողացանք պարգևել ձեզ թույլ սեռ լինելու շքեղությունը, և չնայած ձեր քնքուշ, փխրուն տեսակին, դատապարտված եք լինել ուժեղ ու մեզ էլ սատարել անսպառ հավատի ուժով։ Դուք առաքինությունների սափոր եք, օջախի սյուն ու հենարան, երկրի կենարար ջիղը, մեր սրտի ամենաքնքուշ լարը։ Դուք եք Մայր Հայաստանը, ձեր մեջ է ամփոփված հայրենիքի կերպարը։Աստված ձեզ կարգել է որպես պահապան հրեշտակներ մեր օջախներում։ Աղոթե՛ք մեր տարաբախտ հայրենիքի, ձեր այրերի ու զավակների համար, ձեր աղոթքը երկինք է հասնում։ Խոնարհվում ենք ձեր առաջ, առյուծածի՛ն մայրեր, մեր նահատակ եղբայրների հերո՛ս մայրեր։