«Մենք՝ որպես միջազգային հանրություն, չենք կարող ևս մեկ ցեղասպանություն թույլ տալ». Ալեքսիս Օհանյան
Ամերիկյան Reddit սոցիալական լրատվական կայքի, Initialized Capital վենչուրային ընկերության հիմնադիր, ամերիկահայ գործարար Ալեքսիս Օհանյանն իր թվիթերյան էջում միջազգային հանրությունը կոչ է արել միավորվել ընդդեմ Թուրքիայի և Ադրբեջանի ագրեսիայի՝ ևս մեկ ցեղասպանություն թույլ չտալու համար։
«Մենք՝ որպես միջազգային հանրություն, չենք կարող ևս մեկ ցեղասպանություն թույլ տալ»,- գրել է Օհանյանը։
Օհանյանը նաև կիսվել է ՀՀ վարչապետ Նիկոլ Փաշինյանի գրառմամբ, որտեղ ասվում է, որ «Ադրբեջանա-թուրքական հրոսակախմբերը այստեղ Լեռնային Ղարաբաղի կամ ղարաբաղյան հարցով զբաղվելու համար չեն եկել։ Նրանք չեն եկել, որպեսզի գրավեն գյուղերը, քաղաքները. նրանց գլխավոր նպատակը հայ ժողովուրդն է։ Եվ նրանք իրենց առջև խնդիր են դրել ավարտին հասցնել Հայոց ցեղասպանությունը»:
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 3-ի դրությամբ Արցախի զինուժը խոցել է հակառակորդի՝ 14 ուղղաթիռ, 14 ինքնաթիռ, 123 անօդաչու թռչող սարք, 355 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 2745 զոհ, ավելի քան 4570 վիրավոր։ Հայկական կողմից, նախնական տվյալներով, կա 209 զոհ և 200-ից ավելի վիրավոր։
Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում՝ 11 մարդ։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։