Իրանում փորձագիտական շրջանակները հանդես են գալիս հայկական կողմի օգտին
Հետևում եմ իրանական Telegram-ի խմբերից մեկին, որտեղ ներկա են Իրանի ներկա ու նախկին դիվանագետներ, Իրանում Հայաստանի ու Ադրբեջանի նախկին դեսպաններ և տարածաշրջանի հարցերի փորձագետներ: Բարեբախտաբար տրամադրությունը 100 տոկոսով հայերի կողմն է: Նկատի առնելով Իրանի սահմանին պանթուրքիստական շարժումների ակտիվացման վտանգը, որը նաև կարող է տարածվել Իրանի հյուսիս-արևմտյան նահանգներում և լուրջ հարցեր առաջացնել Իրանի ազգային անվտանգության և տարածքային ամբողջականության համար բոլոր փորձագետները գրեթե միաձայն պաշտպանում են տարածաշրջանում կայունության վերահաստատումը և ընդգծում են որ պիտի կանգնել հայերի կողքին:
Հետաքրքիր է փորձագետներից մեկի կարծիքը, որը ներկայացնում եմ թարգմանաբար:
«Հայաստանն Իրանի ամրոցն է ու նույնիսկ ռուս-իրանական առաջին պատերազմի ժամանակ չնայած ռուսների հետ կրոնական առնչություններին հայերը հավատարիմ մնացին Իրանին: Բաքուն հանձնվեց, բայց Երևանը կանգնեց Իրանի կողքին: Մենք Հայաստանի հետ միասնականության 2700-ամյա բացառիկ պատմություն ունենք: Մի անգամ էլ, որ Վարդան Մամիկոնյանի ժամանակ պատերազմ եղավ, մեր մեղքով էր, որ փորձում էինք նրանց բռնի ուժով զրադաշտական դարձնել: Իզուր»:
***
Գաղտնիք չէ, որ Իրանը տարիներ շարունակ պատերազմ է մղել Սիրիայում (և դա նույնիսկ ինքն է խոստովանել) որպեսզի իր սահմաններից հեռու պահի թաքֆիրական ահաբեկչական խմբերին: Երբ այս խմբերը հասել էին Բաղդադի դարպասներին Իրանը թույլ չտվեց նրանց առաջխաղացքը դեպի իր սահմանները:
Տարածաշրջանում վերջին զարգացումների և թուրք-ադրբեջանական դավադրության արդյունքում հիշյալ ահաբեկչական խմբերն այս պահին հայտնվել են Իրանի հյուսիս-արևմուտքում, Իրանի սահմանից ընդամենը մի քանի կիլոմետր հեռավորության վրա: Դրան զուգահեռ Իրանի սահմանամերձ ազերիաբնակ նահանգներում ակտիվացել են պանթուրքիստական հոսանքները: Մի քանի միլիոն հետևորդներ ունեցող «Տրակտոր» ֆուտբոլային ակումբի թուիթերյան էջը տարածել է Ադրբեջանի պաշտպանության նախարարության տեսագրությունը և շնորհակալություն է հայտնել Ադրբեջանի բանակին: Այդ բոլորն աննկատ չեն կարող մնալ Իրանի իշխանությունների կողմից:
Անկասկած Իրանը որոշակի ժամանակ հանդես կգա կողմերին խաղաղության կոչերով բայց չեմ կասկածում, որ դիմելու է ցանկացած քայլի կանխելու համար իր համար ամրոցի նշանակություն ունեցող Արցախի ազատագրված տարածքների կորուստը: Հատկապես եթե դա պիտի հանգեցնի այդ տարածքներում այն ուժերի ներկայությանը, որոնց դեմ ժամանակին մեծածախս պատերազմ է մղել Սիրիայում ու Իրաքում:
Ռոբերտ Մարգարյանի ֆեյսբուքյան էջից