Անկախ նրանից` Գագիկ Ծառուկյանին կկալանավորեն, թե ոչ, հանրահավաք անելու ենք. Արսեն Բաբայան. Տեսանյութ
Գագիկ Ծառուկյանի գործը կապում ենք ընդդիմության գործունեությունը խոչընդոտելու փորձի հետ, խոսքը ամսի 8-ի հանրահավաքի և մնացած բոլոր գործողությունների մասին է. դատարանի բակում լրագրողների հետ զրույցում ասաց «Հայրենիք» կուսակցության խորհրդի անդամ Արսեն Բաբայանը:
Նրա խոսքով՝ իշխանությունն իր բոլոր հնարավոր միջոցներով ամեն ինչ անում է, որ ընդդիմությունը չիրականացնի իր պլանները, բայց, այնուամենայնիվ, ընդդիմությունն իրականացնելու է իր բոլոր պլանները և հասնելու է հաջողության: Նա հավելեց, որ անկախ այն հանգամանքից՝ Գագիկ Ծառուկյանը կկալանավորվի, թե ոչ, իրենք հանրահավաք անցկացնելու են, և հանրահավաքը լինելու է մարդաշատ ու շատ բան ասող:
Հարցին՝ իշխանափոխության ի՞նչ օրակարգ ունեն, ճանապարհային քարտեզ կա, նա պատասխանեց. «Հանրահավաքի ժամանակ կտեղեկանք մնացած գործողությունների կամ գործողությունների մի շարքի մասին: Այդ բոլոր գործողությունները բերելու են վերջնական արդյունքի, իսկ արդյունքն այն է լինելու, որ կառավարությունը հրաժարական է տալու, նոր կառավարություն է ձևավորվելու, և այդ նոր կառավարությունը անցկացնելու է արտահերթ խորհրդարանական ընտրություններ»:
Ըստ Բաբայանի՝ դա ավելի քան իրատեսական է և լինելու: Սակայն Բաբայանը խուսափեց ժամկետներ կանխատեսելուց: «Ժամանակը ցույց կտա, ամեն օր փոխվում են իրադարձություններ, իշխանությունը գնում է իրեն ավելի քանդելու ճանապարհով և ըստ այդ տրամաբանության՝ շատ շուտով, բայց երբ ասում եմ՝ շատ շուտով, 15 րոպեն նկատի չունեմ»,- ասաց նա:
Հարցին՝ հնարավոր համարո՞ւմ է մինչև հանրահավաքը Արթուր Վանեցյանի նկատմամբ հետապնդում սկսվի, Բաբայանն ասաց, որ այս իշխանություններից ամեն աննորմալ, անտրամաբանական գործողություն համարում է հնարավոր:
Ինչ վերաբերում է իշխանության ներկայացուցիչների բերած այն թեզերին, թե կորոնավիրուսով պայմանավորված թվերն ավելանում են, և այս պայմաններում հանրահավաք իրականացնելը առողջապահական տեսանկյունից վտանգավոր է, Բաբայանն արձագանքեց. «իշխանությունը փորձում է ամեն տեսակ հնարավոր բան հիմա մտածել, մենք չպետք է մոռանանք, որ այս նույն իշխանությունը, երբ մենք էինք ասում, որ չի կարելի իրականացնել հանրահավաքներ, սահմանադրական փոփոխությունների հետ կապված անում էր շատ պարբերական հանրահավաքներ: Ինչ վերբերում է մեր հանրահավաքին, պահպանվելու են բոլոր կանոնները, և մի քիչ էլ առաջ անցնելով ասեմ, որ այս իշխանությունը ՀՀ-ի համար շատ ավելի վտանգավոր է, քան կորոնավիրուսը»:
Նա չբացառեց, որ այլ ուժեր ևս կմիանան եռյակին և նշեց, որ Հանրապետականի և ՀՀ երկրորդ նախագահի հետ հանդիպում, քննարկում չեն ունեցել:
Մանրամասները՝ Tert.am-ի տեսանյութում: