Նիկոլ Փաշինյանը կանգնել է խաչմերուկում, ինչի պատճառով և՛ Արևմուտքն ունի Փաշինյանից դժգոհությունն, և՛ Ռուսաստանը․ Արման Վարդանյան. Տեսանյութ
Այն, որ ՌԴ քաղաքական էլիտան վաղուց փոխել է Հայաստանի քաղաքական էլիտայի նկատմամբ, դա մենք գիտեինք։ Սակայն իշխանությունները կարող են փոխվել, բայց ազգերը մնայուն են։ Ինձ համար վտանգավոր էր այն տենդենցը, որը ես նկատեցի ՌԴ-ում՝ վերաբերմունքը կոնկրետ հայերի նկատմամբ։ Այս մասին «Արմնյուզ» ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «Միասնություն» շարման ղեկավար Արման Վարդանյանը։
Նրա խոսքով՝ վատ վերաբերմունքը իջել է մինչև անգամ կենցաղային մակարդակի․ «Մեր իշխանությունն այս հարցին պետք է լուրջ վերաբերվի, քանի որ այնտեղ մեր հայրենակիցները հացի խնդիր են լուծում, մենք անգամ տեսնում ենք, որ այդ ոչ բարյացակամ վերաբերմունքի պատճառով Ռուսաստանն այսօր հայերի համար սահման չի բացում»։
Անդրադառնալով Հայաստանի ու Ռուսաստանի ղեկավար կազմի հարաբերություններին՝ Արման Վարդանյանն ասել է․ «Ինձ մոտ տպավորություն է, որ Նիկոլ Փաշինյանն աշխարհաքաղաքական խաչմերուկներում խճճվել է։ Կա մի բան՝ Հայաստանի քաղաքական էլիտան պետք է լինի հայամետ, ոչ թե ռուսամետ կամ արևմտամետ։ Այսօր Նիկոլ Փաշինյանը կանգնել է խաչմերուկում, ինչի պատճառով և՛ Արևմուտքն ունի Փաշինյանից դժգոհությունն, և՛ Ռուսաստանը»։
Արման Վարդանյանի խոսքով՝ Հայաստանը երկու բևեռների կողմից կրում է հարվածներ ու ժողովրդի համար անհասկանալի է՝ ի՞նչ է ուզում վարչապետը․ «Այս պարագայում հարց է առաջանում՝ լավ ներդրումներ ո՞նց են գալու Հայաստան, ի վերջո էս երկիր ովքե՞ր են փող բերելու»։
Խոսելով ներքաղաքական հարցերի ու վերջին շրջանում բողոքի մի քանի ակցիաների մասին՝ Արման Վարդանյանն ասել է․ «Վերջին մեկ ամսում օրվա ընթացքում 10-15 բողոքի ցույցեր են տեղի ունենում։ Այս մարդիկ ունեն խնդիր, և այսօր իշխանությունն էլ է հոգնել ասի՝ այս ամեն թերացումների հետևում նախկիններն են կանգնած։ Արդեն դժվար է մարդկանց խաբելը»։
Ըստ Արման Վարդանյանի, այսօր նայելով ժողովրդի տրամադրվածությանը, մոտ 20-25%-ի շրջանում ունենք զանգված, որն ասում է՝ ինչ անում է Նիկոլը, ճիշտ է անում, նույնչափ մարդիկ էլ ասում են՝ սխալ է անում․ «Ունենք նաև 50% տրամադրվածություն, որ մարդիկ ասում են՝ ափսոս, որ չեղավ այն, ինչ մենք ուզում էինք, բայց նախկիններին վերադարձ չի լինելու, ու հենց այս մարդկանց տրամադրվածության վրա աշխատում է Նիկոլ Փաշինյանը»։