Հնարավոր է փոփոխություն՝ միայն հանրային ճնշման միջոցով. Արա Հակոբյանը Կառավարության դիմաց է
Այս խնդրի ամբողջական լուծումը նշանակում է՝ բոլոր պատասխանատուների հեռացումը. դա վերաբերում է ինչպես Կառավարությանը, այնպես էլ Խորհրդրարանին։ Այս մասին այսօր՝ սեպտեմբերի 17-ին, Կառավարության դիմաց ակցիա իրականացնելիս լրագրողների հետ զրույցում ասաց «Ազգային օրակարգ» կուսակցության խորհրդի նախագահ Արա Հակոբյանը։
«Մենք կարծում ենք, որ համախմբումն այս փուլում չպետք է լինի որեւէ անհատի կամ քաղաքական ուժի շուրջ, այն պետք է լինի ծրագրային։ Կարծում ենք՝ դա հնարավոր է եւ այդ ուղղությամբ կան քայլեր»,-ասաց Արա Հակոբյանը։
Նրա կարծիքով՝ հնարավոր է փոփոխություն՝ միայն հանրային ճնշման միջոցով. «Պետք է դադարի Հայաստանում իրականացվել ապազգային քաղաքականությունը եւ ռազմավարությունը՝ բոլոր ոլորտներում, որովհետեւ մենք խոսում ենք կրթությունից, բայց այնպես չի որ մենք չունենք ճգնաժամային իրավիճակ առողջապահության, տնտեսության մեջ։ Բոլոր ոլորտներում ունենք ճգնաժամ եւ այդ լուծում պետք է արմատական լինի»։
Հակոբյանն ասաց, որ իրենք իշխանափոխության համար ունեն ճանապարհային քարտեզ. «Առաջարկում ենք, որ լինի միջանկյալ փուլ եւ այն իր մեջ ներառի ազգային համաձայնության իշխանությունը, դրա նպատակը պետք է լինի մեղմել ճնշումները եւ նախապատրաստել արտահերթ ընտրություններ։ Այդ ընտրությունները լինեն երեքիս կես տարվա կտրվածքով։ Եվ ընտրություններն էլ գնան ոչ թե այս լարումների շրջանակում, այլ ընթանան քաղաքական ծրագրերի եւ նպատակների շուրջ։ Իշխանության նկատմամբ վստահության վարկը նվազել է. նախկինում ստացած քվեներն այսօր չեն կարող ստանալ»։