Դիմակ կրելու պարտադրանքն արհեստական է, քանի որ Կառավարությունն ի սկզբանե չկարողացավ կառավարել կորոնավիրուսի ռիսկերը․ Փոստանջյան. Տեսանյութ
Դիմակներ կրելու պարտադրանքն արհեստական է, քանի որ գործող Կառավարությունը ի սկզբանե չկարողացավ կառավարել կորոնավիրուսի ռիսկերը։ Պարտադրում են դիմակ կրել, որպեսզի այսկերպ փոխհատուցեն իրենց անգործությունը։ Այս մասին Արմնյուզ ՀԸ Անժելա Թովմասյանի՝ «Հայելու առաջ» հեղինակային հաղորդման ժամանակ ասել է «Երկիր Ծիրանի» կուսակցության նախագահ Զարուհի Փոստանջյանը։
Դիտարկմանը՝ ո՞վ է պատասխան տալու այս շոգին դիմակներ կրելու պարտադրանքով առաջացած հիվանդությունների ի հայտ գալու համար, Զարուհի Փոստանջյանը նշել․«Կան հիմնավորումներ, որ դիմակ կրելն անհրաժեշտություն է, բայց ոչ բոլոր վայրերում, ոչ դրսում։ Իրենց այս արարքներով Կառավարությունն ավելի շատ վնասում է, քան օգնում»։
Հարցին՝ ինչու՞ Կառավարությունը գնաց այսպիսի ծայրահեղ քայլերի, Զարուհի Փոստանջյանը պատասխանել է․ «Իշխանությունը ոչ մի կանխարգելիչ քայլ չարեց, որպեսզի զսպի այս համավարակի տարածումը, դրա համար էլ գնում են այսպիսի քայլերի»։
Անդրադառնալով օրերս մամուլում հայտնված տեղեկությանը, որ իշխանական պատգամավորը, ոստիկանապետը արտակարգ դրության ժամանակ մասնակցում են խնջույքների ու մի ներողություն խնդրելով աղմուկն այս հարցերի շուրջ մարում է, քաղաքական գործիչն ասել է․ «Եթե իշխանության ներկայացուցիչները մասնակցում են բազմամարդ հավաքների, ծաղրում են քաղաքացիներին»։
Ըստ Զարուհի Փոստանջյանի՝ իշխանությունը պարտավոր է քաղաքացիներին դիմակներով ապահովել․ «Ես վստահ եմ, որ մարդիկ մեկ դիմակը օրերով են կրում։ Եթե Կառավարությունն ասում է՝ հաց գնելու փոխարեն դիմակ գնիր, պարտավոր է հասարակությանը դիմակներ տրամադրել։ Երբ մի արգելք են սահմանում, պետք է հաշվի առնել՝ քաղաքացիներն ինչքան են տուժում այդ արգելքներից»։
Զարուհի Փոստանջյանի համոզմամբ՝ Կառավարությունը մշտապես հասարակությանը վնաս է պատճառում և անպատիժ է մնում։
Հարցին՝ ինչո՞վ է պայմանավորված, որ հասարակությունը հանդուրժում է այս իշխանության քայլերը,Փոստանջյանը նշել է․«Մեր հանրությունը չի ցանկանում չարչարվել։ Տեսեք՝ մի քանի օր շարունակ հանրությունը «Մերժի՛ր Սերժին» կոչերով հանդես եկավ ու այլևս ոչինչ չարեց, հիմա էլ ասում են՝ մենք ընտրել ենք այս իշխանությանը, դե թող գնան, աշխատեն»։
Անդրադառնալով չընդունված դիմորդների օրեր շարունակ իրականացվող բողոքի ակցիաներին, Զարուհի Փոստանջյանն ասել է․ «Կրթական համակարգում Արայիկ Հարությունյանը վերադառնում է խորհրդային տարիների կոռուպցիոն սխեմային։ Այս ամենը հատուկ է արվում և իրենք կորոնավիրուսի անվան տակ այսպիսի որոշումներ են կայացնում»։
Հարցին՝ ի՞նչ են շահել իրենք այս ամենից, Զարուհի Փոստանջյանը պատասխանել է․ «Այս ծրագրով իրենք շահել են այն, որ, օրինակ՝ Բժշկական համալսարան բարձր միավորներ ստացած դիմորդը չի ընդունվել, իսկ ցածր միավորներովն՝ ընդունվել է։ Սրա նպատակն է, որ ապագայում մենք չունենանք մեզ բուժող որակյալ բժիշկներ, չունենանք նաև իրավաբաններ ու տնտեսագետներ»։