Ոստիկանապետը տեղակալների հետ Ծիրանիում է. «ախրանան» ստիպեց ջնջել ոստիկանապետի քեֆի վիդեոն
Hraparak.am-ը գրում է. Այս պահին Կոտայքի մարզի «Ծիրանի» ռեստորանում ուշագրավ խնջույք է ընթանում՝ ՀՀ ոստիկանապետ Վահե Ղազարյանն, իր տեղակալների և ևս 30 հյուրերի հետ կերուխումի մեջ են:
Առանց դիմակների, առանց սոցիալական հեռավորություն պահպանելու: Մինչդեռ պարետի որոշմամբ 5 հոգուց ավելի չպետք է նստեն սեղանի շուրջ: Եթե արտակարգ դրության պահանջները ոստիկանները, հատկապես բարձրաստիճան ոստիկանները, չեն պահպանում, ինչ պահանջել շարքային քաղաքացիներից:
***
Ինչպես արդեն տեղեկացրել ենք, ՀՀ ոստիկանապետ Վահե Ղազարյանը շուրջ 30 մեքենայով և բազմաթիվ մարդկանց հետ Կոտայքի մարզի Ծիրանի ռեստորանում է։
Ոստիկանապետի խրախճանքի մասին լուրը ստանալուց հետո շտապեցինք «դեպքի վայր», սակայն ոստիկանները դիմեցին ոչ օրինական քայլի. նախ մեզ մոտեցան մի քանի անվտանգության աշխատակիցներ, որոնք դուրս հանեցին մեզ ռեստորանի տարածքից, մինչ այդ էլ՝ ստիպեցին հեռացնել հեռախոսով տեսանկարահանած տեսանյութերը, թե ինչպես է Վահե Ղազարյանը մոտենում ծառայողական մեքենային։
Թեպետ ջնջվել են որոշակի կադրեր, սակայն, այնուամենայնիվ, մենք տեսանյութ ունենք, որը տեսանկարահանված է հեռվից։
***
Թեմային անդրադարձել է նաեւ «Փաստինֆո»-ն գրելով. ՀՀ ոստիկանության բարձրաստիճան ոստիկանները` ՀՀ ոստիկանապետ Վահե Ղազարյանի գլխավորությամբ խնջույքի են մասնակցում «Ծիրանի» ռեստորանային համալիրում:
«Տարածքում գտնվող մեր լրագրողը նկատել է շուրջ երկու տասնյակի հասնող ծառայողական` ոստիկանության, պետական համարանիշերով, ինչպես նաեւ ճանապարհային ոստիկանության ուղեկցող ավտոմեքենաներ:
Խնջույքի առիթը, ըստ մեր ունեցած տեղեկությունների, Արցախի Հանրապետության նորանշանակ ոստիկանապետ, ոստիկանության գեներալ – մայոր Աշոտ Հակոբջանյանի հայաստանյան այցն է, ում տարել են հյուրասիրության` այն վերածելով իսկական տոնախմբության:
Արդեն ժամեր տևող խնջույքի աղմուկն այնքան մեծ է, որ գրավել նաև ռեստորանի այլ այցելուների ուշադրությունը:
Հիշեցնենք, որ համավարակով պայմանավորված, պարետատան սահմանած կանոնների համաձայն՝ բազմամարդ հավաքներն ու խնջույքները ՀՀ տարածքում արգելված են: Ստացվում է սակայն՝ վարչապետ Նիկոլ Փաշինյանի մանկության ընկեր հանդիսացող ՀՀ ոստիկանապետ Վահե Ղազարյանը ոչ միայն չի հետևում պարետատան սահմանած հակահամաճարակային կանոններին, այլև արհամարհելով վարչապետ Նիկոլ Փաշինյանի բազմաթիվ հորդորները՝ վտանգում է իր և իր շրջապատի անդամների առողջությունն ու խնջույքներ կազմակերպում:
Հետաքրքիր է, պատասխանատվության ինչ միջոցներ կձեռնարկի պարետատունը, երկրի վարչապետը, որ իր համաերկրացին խախտում է օրենքը, թե այնուամենայնիվ օրենքի առաջ ոչ բոլորն են հավասար»,- գրում է կայքը: