ԲԴԽ-ն հնարավորություն ունի ցույց տալու՝ իշխանությունների կամակատա՞րն է, թե՞ ոչ. օրինական որոշման պայմաններում դատավոր Ալ. Ազարյանը չի կարող ենթարկվել պատասխանատվության. Լուսինե Սահակյան
Իշխանությունները մեծ ցանկություն ունեն, որ դատավոր Ալեքսանդր Ազարյանը պատասխանատվության ենթարկվի, սակայն այստեղ պետք է իր լուրջ դերակատարումն ունենա ԲԴԽ-ն: Վերջինս այժմ հնարավորություն ունի ցույց տալու՝ ի՞նքն էլ կամակատար է, թե՞ ոչ: Օրինական որոշման պայմաններում Ազարյանը չի կարող ենթարկվել պատասխանատվության, և եթե լինի պատասխանատվություն, ապա միանշանակ է, որ ԲԴԽ-ն իշխանությունների կամակատարն է:
Այս մասին Tert.am-ի հետ զրույցում ասաց փաստաբան Լուսինե Սահակյանը՝ անդրադառնալով ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությանը։
«Ես ոչինչ չեմ բացառում, ԲԴԽ որոշման հետ կապված, բայց այն դեռևս հնարավորություն չի ունեցել ապացուցելու, որ անկախ է և կատարում է իր վրա դրված պարտականությունները. սա հնարավորություն է՝ դա ցույց տալու»,-հավելեց փաստաբանը:
Նա ընդգծեց, թե վերջին երկու տարիների զարգացումները թույլ են տալիս գալ եզրահանգման, որ պետությունը չկորցնելու գործում իրենց շատ մեծ դերակատարումն ունեն մի քանի դատավորներ, նրանց թվում առաջին տեղում է Ալեքսանդր Ազարյանը: «Իշխանությունը, որը ցանկանում է, որ բոլորը ենթարկվեն իրեն ու դառնան իր կամակատարը, պետք է պայքարի նման անձանց դեմ»,-նշեց Սահակյանը, ապա հավելեց.
«Վստահ եմ, որ Ազարյանին պատասխանատվության ենթարկելով, միևնույն է, իշխանությունները չեն հասնելու իրենց համար ցանկալի արդյունքի, որովհետև ո՛չ Ազարյանն է այդ որոշումից փոխելու իր դիրքորոշումը և դառնալու կամակատար, ո՛չ էլ այն մի քանի դատավորները, որոնք այս ժամանակահատվածում կարողացել են ապացուցել, որ իրենք կանգնած են ոչ թե իշխանությւոնների, այլ օրենքի կողքին»,-ասաց նա:
Հարցին՝ ինչո՞ւ մինչ այժմ դատավորների հասցեին հնչած վիրավորական, մեղադրական հայտարարութուններին իրավական գործընթացներ չեն հաջորդել, իսկ Ազարյանի՝ ՀՔԾ-ի պետի մասին արված արտահայտությունից հետո նման գործընթաց է սկսվում, Սահակյանը նախ ընդգծեց, որ կատարվողն իրավական գործընթաց չէ, այլ հաշվեհարդար դատավորի հետ, ապա ասաց.
«Եթե մենք խոսեինք իրավական պետությունից, բազմաթիվ դեպքերում անձինք կենթարկվեին պատասխանատվության, ավելին՝ կոնկրետ դատավորների նկատմամբ եղել են գործողություններ, որոնք պետք է քրեաիրավական որակման արժանանային, բայց դա չի արվում, որովհետըև իշխանությունը նպատակ չունի ունենալ անկախ դատավորներ, հարձակումներն էլ պատահական չեն, իշխանությունների դրդմամբ են իրականացվում, և հիմնականում հենց իրենց կողմից են այդ արտահայտություններն արվում: Մենք չունենք իրավական պետություն, և իրենք ինչ ցանկանում, այն էլ անում են, պատասխանատվության չեն ենթարկվում, իսկ մնացած դեպքերում, երբ անգամ վարույթ չէր կարող հարուցվել, հարուցվում է, և փորձում են պատասխանատվության ենթարկել դատավորին, որն անկաշկանդ է գործում և ղեկավարվում է միայն օրենքով»։
Հիշեցնենք, որ կարգապահական վարույթը հարուցվել է արդարադատության նախարար Ռուստամ Բադասյանի կողմից՝ ՀՔԾ պետ Սասուն Խաչատրյանի հաղորդման հիման վրա:
Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ հարուցելու վերաբերյալ հաղորդումն արդարադատության նախարարություն է ներկայացրել Հատուկ քննչական ծառայության կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանն, ում վարույթում քննվել է «5-րդ Ալիքի» սեփականատեր Արմեն Թավադյանի վերաբերյալ քրեական գործը։