Ժամանակն է, որ ժողովուրդը ոտքի կանգնի. այո, եթե անհրաժեշտ է, պետք է գրավել հենց ռադիոտունը. Ռուբեն Հակոբյան. Տեսանյութ
Պետության մեջ տեղի է ունենում սողացող հեղաշրջում: Այս մասին, այսօր՝ հունիսի 26-ին, ՍԴ-ի շենքի մոտ լրագրողների հետ զրույցում նշեց «Վերնատուն» ակումբի անդամ, քաղաքական վերլուծությունների «Ակունք» կենտրոնի տնօրեն Ռուբեն Հակոբյանը: Հաղորդում է NEWS.am-ը:
Նրա խոսքով, ՍԴ-ն բոլոր դեպքերում կարողացավ կանգնել մեկ տարի ու պայքարել իշխող ուժի դեմ, իսկ իշխող ուժ ասելով նկատի ունի մեկ մարդու:
«Մենք պետք է վարձահատույց լինեինք ՍԴ-ին, որովհետեւ շատ ցինիկորեն իշխող ուժը Նիկոլ Փաշինյանի գլխավորությամբ հարձակվել է ՍԴ-ի վրա եւ ոչ մի օրենք չի ճանաչում: Ես կարծում էի, որ այսօր այս փողոցները պետք է փակվեին, որովհետեւ իրենք օգտագործում են կորոնավիրուսը, հակաօրինական օրենքներ են ընդունում, Սահմանադրությունն են ցեխաջրի մեջ գցում: Կարծում եմ՝ ժամանակն է, որ ժողովուրդը ոտքի կանգնի: Այո, եթե անհրաժեշտ է, պետք է գրավել հենց ռադիոտունը: Ցավոք այնպիսի իրավիճակ է ստեղծվել, որ օրենքի շրջանակում փոխել իշխանությունը հնարավոր չէ, որովհետեւ ինքը բացարձակ հակաօրինական դաշտում է գտործում Փաշինյանը: Ինչպես ինքը իրականացրեց պետական հեղաշրջում, անշուշտ ուժային որոշ կառույցների հետ միասին, հիմա պետք է հենց պետական պահպանության օբյեկտները գրավելով, կլինի ռադիոտուն, հեռուստատեսություն, կլինի պետական պահպանության տակ գտնվողն մյուս օբյեկտները, պետք է գրավել եւ իրեն վռնդել իշխանությունից: Իրենք պետությունը տանում են դեպի կործանում»,-հայտարարեց Հակոբյանը:
Նա ընդգծեց, որ ժամանակն է, որ ընդդիմությունը ադեկվատ քայլեր անի. «Կներեք, բայց այն նվնվոցները, որ հակաօրինական քայլեր են ձեռնարկվում եւ այլն, հասկացանք, մենք դա ասում ենք, նա էլ ասում է՝ թքած ունեմ օրենքների ու Սահմանադրության վրա: Ինքը կարծում է, որ իր ընտանեկան կապալը պետք է զբաղվի ծխախոտի, զենքի, ադամանդի մաքսանենգությամբմ, եւ ստեղծել է իրավիճակ, որ ժողովուրդը հակաօրինական դաշտում ապրի ու ենթարկվի իրեն»:
Ռուբեն Հակոբյանը կարծում է, որ կգտնվեն այդպիսի մարդիկ, որոնք կգրավեն իր նշած պետական օբյեկտները. «Փաշինյանը կարողացավ ստեղծել բռնապետի կերպար: Ինքը հոգեկան անհավասարակշիռ անձնավորություն է: Ես մասնագետների հետ խոսել եմ, իսկապես այդ մարդը հոգեկան խնդիրներ ունի, եւ լուրջ վտանգ է պետության համար:
Աղբյուր՝ NEWS.am