Ալիևը ներկա չի գտնվի հունիսի 24-ին Մոսկվայում կայանալիք Հաղթանակի զորահանդեսին

Այսօր ռուսաստանյան կողմի նախաձեռնությամբ տեղի է ունեցել Պուտին-Ալիեւ հեռախոսազրույց: Կրեմլի մամուլի ծառայությունը տեղեկացրել է, որ քննարկվել են երկկողմ հարաբերությունների եւ կորոնավիրուսի դեմ պայքարի հետ կապված հարցեր:

Մամուլում այս տեղեկատվությունը տարածվելուց կարճ ժամանակ անց Ադրբեջանի պետական լրատվական գործակալությունը հանդես է եկել հաղորդագրությամբ, ըստ որի՝ հեռախոսազրույցի ընթացքում Իլհամ Ալիեւը տեղեկացրել է, որ չի մեկնի Մոսկվա՝ ներկա գտնվելու ֆաշիզմի դեմ հաղթանակի 75-ամյակին նվիրված զորահանդեսին՝ կապված «համավարակային իրավիճակով պայմանավորված սահմանափակումների հետ»: Միջոցառումներին Ադրբեջանը կներկայացնի պաշտպանության նախարարը: Ըստ ադրբեջանական կողմի տեղեկատվության՝ ՌԴ նախագահն ասել է, որ «ըմբռնումով է մոտենում այդ որոշմանը»: Ինչու՞ Ալիեւը հրաժարվել է Մոսկվա մեկնել՝ բարդ է ասել:

Ուշագրավ է, որ նախօրեին ՌԴ ԱԳՆ պաշտոնական ներկայացուցիչն անոնսավորել էր այս ամսվա վերջին ԼՂ կարգավորման հարցով տեսակոնֆերանսի անցկացումը: Ըստ երեւույթին, այդ համատեքստում էր, որ վարչապետ Փաշինյանն Ազգային ժողովում ակնարկեց, որ եթե Ադրբեջանի ղեկավարության հետ երկխոսությունը չստացվի, հարկ կլինի ուղղակի դիմել ադրբեջանական ժողովրդին: Նախատեսվա՞ծ էր Մոսկվայում Փաշինյան-Ալիեւ թեկուզ ոչ պաշտոնական շփում: Ալիեւը հրաժարվու՞մ է երկխոսությունից: