Եթե լրագրողների իրավունքները որեւէ կերպ խախտվել են, իհարկե դատապարտում եմ. Արարատ Միրզոյան. Տեսանյութ
Որեւէ փորձ լրագրողների գործունեության խոչընդոտմանը կդատապարտենք։ Այս մասին այսօր՝ հունիսի 18–ին, ԱԺ–ում լրագրողների հետ զրույցում ասաց ԱԺ նախագահ Արարատ Միրզոյանը՝ անդրադառնալով 2 օր առաջ ԱԱԾ շենքի դիմաց ոստիկանների կողմից լրագրողների նկատմամբ ուժի կիրառմանը։
«Ես մանրամասներին տեղյակ չեմ, այն որ ինչ դուք հիշատակում եք, անկեղծորեն, ոչ էլ կադրեր եմ տեսել, լուրեր եմ տեսել դժգոհությունների մասին, բայց նաեւ զուգահաեռաբար տեսել եւ լսել եմ կարծիքներ, որ ոչ մի առանձնակի բան չի արվել։ Կրկնում եմ ինքս կադրերը չեմ տեսել եւ սեփական դատողություն չեմ կարող անել»,– ասաց նա։
Լրագրողի դիտարկմանը, որ ոստիկանները տեսել են, որ այդտեղ լրագրողներ են եւ նրանք եղել են համապատասխան տեխնիկայով, Միրզոյանն ասաց. «Գուցե այն պահին, երբ դուք հարցազրույց եք վերցրել, զգուշացվել եւ խնդրանք է եղել ազատել այդ տարածքը, գուցե հղում է արվել արտակարգ դրության պայմաններում հավաքների իրականացման արգելքին, ես չեմ իմանում, իսկապես մանրամասներն էական են, եթե որեւէ կերպ խախտվել է, իհարկե ես դատապարտում եմ եւ կարծում եմ, որ պետք է լինի ծառայողական քննություն, բայց միեւնույն ժամանակ պետք է լրագրողներն էլ հասկանան, որ կանոնները, օրենքները համընդհանուր են եւ որեւէ մեկին, ինչպես ոչ քաղաքական գործչին, ինչպես ոչ գործարարին այնպես էլ լրագրողին չի դասում օրենքից վեր»։