Իշխանությունն ինչքան շատ է փորձում համոզել, որ Ծառուկյանի նկատմամբ հետապնդումը քաղաքական չէ, այնքան շատ է համոզում, որ իրավաբանությունն այստեղ իսպառ բացակայում է
«Հրապարակ» թերթը գրում է «Ինչքան շատ է իշխանությունը փորձում համոզել, որ Գագիկ Ծառուկյանի նկատմամբ հետապնդումը բացառապես իրավական գործընթաց է` ոչ մի քաղաքական տարր չի պարունակում, այնքան շատ են մարդիկ համոզվում, որ իրավաբանությունն այստեղ իսպառ բացակայում է:
Երեկ Ազգային ժողովում Նիկոլ Փաշինյանը վստահեցրել է, որ հետապնդումները չեն սկսվել Գագիկ Ծառուկյանի հայտնի ելույթից հետո, այլ հին են, և օրինակներ է բերել, որ հիմնավորի իր ասածը: Նա հերթով թվարկել է, թե քանի գործ է հարուցված ԲՀԿ առաջնորդի ու նրա մերձավորների նկատմամբ` Էդիկ Բաբայանի, Սեդրակ Առուստամյանի, Ծառուկյանի որդու` Նվերի, Ծառուկյանի փեսայի` Կարապետ Գուլոյանի: Հետապնդումները պոզով-պոչո՞վ են լինում, եթե այդքան մարդու հալածում եք, դրանից լավ ապացո՞ւյց:
Եվ բոլոր հայտարարությունները` վերջնական դատարանի տոնով ու «դատավճիռներով»: Ահա նրա գրառումը, «ժողովրդի ազատ կամարտահայտմանը խոչընդոտելու (և ընդհանրապես` կոռուպցիայի, չարաշահումների, հարկեր վճարելուց խուսափելու և այլ) բոլոր դեպքերը պետք է Հայաստանի օրենսդրությամբ սահմանված կարգով քննվեն և հանգեն օրենքով նախատեսված արդյունքի», կից` Գագիկ Ծառուկյանի լուսանկարը:
Կամ. «Հայ ժողովուրդը ղազագրի վրա հիմնված քաղաքական գործիչների վզներից բռնելու և դուրս է շպրտելու այս դահլիճից»: «Ղազագիր» ասելով` նկատի ունի ԱԺ ԲՀԿ խմբակցության պատգամավորների անձնական նամակներն իրենց առաջնորդին, որոնք իրավական առումով զրո նշանակություն ունեն և դատական գործին չեն կարող կցվել, որովհետև հանցակազմ չեն պարունակում: Իսկ դրանց հրապարակումն ինքնին մարդու իրավունքների և անձնական նամակագրության գաղտնիության կոպիտ խախտում է: Գրել են` լավ են արել, ո՞ւմ ինչ գործն է: Այս իրավական բեսպրեդելը ե՞րբ է ավարտվելու»,-գրում է թերթը:
Նյութն ամբողջությամբ` թերթի այսօրվա համարում: