Թվում էր՝ Նիկոլ Փաշինյանը՝ որպես պետության ղեկավար, հանդուրժողականության կոչ կանի, բայց բացահայտ պաշտպանեց ընդդիմության հանդեպ կիրառված բռնությունը. Ռուբեն Հակոբյանը՝ ԱԺ ծեծկռտուքի մասին
Կարծում եմ՝ խորհրդարանական ընդդիմությանն ինչ-որ պահի ահաբեկելու սցենարը մշակված էր նախօրոք, ուղղակի հանգամանքների բերումով այն իրականացվեց այդ օրը: Իսկ կուլմինացիան վարչապետ Նիկոլ Փաշինյանի ելույթն էր, որով նա բացահայտ պաշտպանեց ընդդիմության նկատմամբ կիրառված բռնությունը: Այդ ելույթն ավելի շատ նման էր քաղաքական ողբի: Tert.am-ի հետ զրույցում նման տեսակետ հայտնեց ԱԺ նախկին պատգամավոր, քաղաքական վերլուծությունների «Ակունք» կենտրոնի ղեկավար Ռուբեն Հակոբյանը՝ անդրադառնալով ԱԺ-ում տեղի ունեցած ծեծկռտուքին:
«Թվում էր, թե Նիկոլ Փաշինյանը՝ որպես պետության ղեկավար, իր կարգավիճակին հարիր, լարվածությունը թուլացնող, հանդուրժողականության կոչով հանդես կգա, բայց պարզվեց` ո´չ: ԱԺ-ում, անձամբ ականատես լինելով այդ խուլիգանությանը, իր ելույթով նա պաշտպանեց թիմակցի` ընդդիմադիր խմբակցության ղեկավարին հարվածելու, նրա «գլուխը ցխելու», «վիզը կտրելու» հայhոյախառն սպառնալիքները: Նույնիսկ մեղադրեց գլխին հետևից հարվածներ ստացած խմբակցության ղեկավարին` ամբիոնի մոտից տեղաշարժվելու համար, ինչն, իր գնահատմամբ, ավելի զայրացրեց հարձակման նետված վիզը կտրողին»,-ասաց Հակոբյանը:
Քաղաքական գործչի խոսքով՝ ավելի անընդունելի տեսարան էր, երբ իշխող մեծամասնությունն իր առաջնորդի ելույթը ընդունեց ծափահարություններով, ինչն ուղղորդվում էր ԱԺ նախագահի կողմից:
«Ինչպես դիպուկ բնորոշել է ԱԺ նախկին պատգամավոր Վահե Հովհաննիսյանը, այս խորհրդարանական մեծամասնությունն իր քաղաքական անձնագիրը հանձնել է Նիկոլ Փաշինյանին, ավելացնեմ` նա էլ անխնա ոչնչացնում է այդ անձնագրերի տերերին: Այդ տեսարանը, իսկապես, նման էր իշխող ուժի քաղաքական «հոգեհանգստի» արարողությանը: Ճիշտ է, նույնիսկ եվրոպական խորհրդարաններում են ծեծկռտուքներ լինում, բայց մերը աննախադեպեր էր` այն ողջունվեց պետության ղեկավարի և ծափահարության արժանացավ քաղաքական մեծամասնության կողմից»,-ասաց նա:
Ինչ վերաբերում է Էդմոն Մարուքյանի պահանջած քաղաքական գնահատականին, Հակոբյանը նկատեց, որ այդ գնահատականը արդեն հնչեց իշխող կուսակցության ղեկավարի կողմից: «Եթե կարճ` ըստ Փաշինյանի՝ բոլորը կարժանանան Մարուքյանի ճակատագրին, եթե փորձեն քննադատել իշխանությանը: Եվ պատահական չէ, որ քրեական ենթամշակույթը ներկայացնողի կարգավիճակով կենտրոնական խոսափողի դիմաց հանգրվանել է Սասուն Միքայելյան տեսակը: Իսկ Մարուքյանը պետք է սկզբունքային և հետևողական լինի իր ներկայացրած պահանջի կատարման նկատմամբ»,-ասաց Հակոբյանը, ապա, անդրադառնալով գործող իշխանության պահվածքին, ավելացրեց.
«Եթե նախկինում քննադատական խոսքի հանդեպ նման վերաբերմունք լիներ, ապա Նիկոլ Փաշինյանն ամենօրյա ռեժիմով պետք է հայտնվեր Էդմոն Մարուքյանի կարգավիճակում, քանի որ ընդդիմադիր Փաշինյանի ցանկացած քննադատական ելույթ շատ ավելի խիստ ու վիրավորական էր, քան գործող խորհրդարանի ընդդիմության որևէ ներկայացուցչի խոսքը: Բայց կարծես` թե´ ինքը, և թե՛ իր թիմակիցները մոռացել են ընդդիմադիր Փաշինյանի խորհրդարանական «ստորագրությունը»: ՀՀ-ում երբեք որևէ իշխանություն այսքան անհանդուրժող չի եղել, ինչպիսին օրվա իշխանությունն է»:
Անդրադառնալով իշխանության հետագա քայլերին ու ընդդիմության առաջիկա անելիքներին՝ քաղաքական գործիչը նշեց.
«Նիկոլ Փաշինյանը հասկացել է, որ այլևս չունի իշխանությունը պահելու որևէ ռեսուրս: Միակ ռեսուրսը, ինչով նա եկավ իշխանության և երկու տարի շարունակ այն ագահորեն օգտագործեց, սոցիալապես վատ վիճակում հայտնված ժողովրդի էմոցիան անխնա գողանալն ու շահարկելն էր, ինչը, կարծում եմ, այլևս սպառվում է: Ակնհայտ է` ԱԺ-ում տեղի ունեցածով նա ազդարարեց, որ իշխանությունը պահելու համար դիմելու է ահաբեկումների և բռնությունների: Բայց չեմ կարծում, որ հանրությունը կամ որևէ քաղաքական ուժ լուրջ կընդունի այս իշխանատենչ երևակայությունը: Կարծում եմ՝ ժամանակն է, որ ընդդիմության ներկայացուցիչները համախմբվեն, ձևավորեն համակարգող խորհուրդ` Հայաստանի և Արցախի անվտանգության ու տնտեսության գահավիժումը կասեցնելու օրակարգով: Պետք է հստակ քայլեր ձեռնարկել իշխանափոխության համար և այն պետք է իրականացնել հնարավորին սեղմ ժամկետում: Այսօր մենք տանուլ ենք տալիս մեր վաղը»,-ասաց Ռուբեն Հակոբյանը:
Հիշեցնենք՝ պատգամավորների միջև ծեծկռտուքը տեղի ունեցավ Կառավարության 2019թ. ծրագրի քննարկման ընթացքում: «Լուսավոր Հայաստան» խմբակցության ղեկավար Էդմոն Մարուքյանի ելույթի ժամանակ Սասուն Միքայելյանը միջամտեց, ինչին հաջորդեց Էդմոն Մարուքյանի պատասխանը, թե՝ «ինչը կցխեք»: Էդմոն Մարուքյանն իջավ ամբիոնից, ինչից հետո Սասուն Միքայելյանի ու նրա միջև ծեծկռտուք տեղի ունեցավ, որին միջամտեցին այլ պատգամավորներն ու Կառավարության անդամները: