«Ունեցել ենք 75 զոհ»․ Սերժ Սարգսյանը՝ հայկական կողմի կորուստների մասին ապրիլյան պատերազմի ժամանակ
Չորս տարի առաջ ղարաբաղաադրբեջանական հակամարտ զորքերի շփման գծում Ադրբեջանի սանձազերծած ագրեսիայի արդյունքում սկսված պատերազմի ընթացքում հայկական բանակը ունեցել է 75 զոհ։ Այս մասին Ապրիլյան պատերազմի 4-րդ տարելիցի օրը, «5-րդ ալիք»-ի ցուցադրած «Հաղթանակի ապրիլ» փաստավավերագրական ֆիլմում տեղեկացրին ՀՀ երրորդ նախագահ Սերժ Սարգսյանը։
Սերժ Սարգսյանն ասաց․ «Թող տպավորություն չստեղծվի, որ մեր 75 զոհերի կսկիծը նույնիսկ մինչև հիմա անցել է ինձ մոտ, ո՛չ, 75 երիտասարդ, յուրաքանչյուրն ամեն մի տան ճրագ… Բայց, ցավոք սրտի, հող պահելը, ռազմական գործողությունները երբեք չեն լինում առանց կորուստների»։
Ս. Սարգսյանը նաև պարզաբանեց, որ սպաները, պայմանագրայինները զոհերի շարքում մեծամասնություն են կազմել և դա ուղղակի խոսում է այն մասին, որ մեր սպաները մեր քաջարի զինվորների հետ համահավասար կռվել են և փառքով են պսակել իրենց անունները։ «Գիտեք՝ բոլոր այդ հեքիաթները, թե սպաները լավ չեն կառավարել, ուղղակի տմարդի զրույցներ են, որ վարվել են և հիմա էլ փորձում են վարել։ Զավեշտը նրանում է, որ մինչև հիմա որոշ լրատվամիջոցներ ու գործիչներ խոսում են մեր կողմից հարյուրավոր զոհերի մասին, չեմ հասկանում այդ մազոխիստական հակումները»,- նշեց Սերժ Սարգսյանը։
Zham.am