Երազելը վատ բան չի. Վազգեն Սարգսյանի հարազատները հերքում են Լիլիթ Կարապետյանի և նրա սիրավեպի մասին լուրը
Երեկ՝ մարտի 5-ին, լրացավ Հայաստանի ազգային հերոս եւ Արցախի հերոս, սպարապետ Վազգեն Սարգսյանի 61-ամյակը։ Այդ առիթով Tert.am-ը զրուցել էր երգչուհի Լիլիթ Կարապետյանի հետ, որը պատմել էր իր ու սպարապետի սիրավեպի մասին։
Երգչուհին ասել էր, թե սպարապետի մայրը դեմ էր իրենց հարաբերություններին, քանի որ արդեն որդու համար ուներ ընտրյալ։ Նշել էր, թե միասին լուսանկարներ ունեն, սակայն այդ լուսանկարները գտնվում են Վազգեն Սարգսյանի տանը։
Լիլիթ Կարապետյանն ասում էր, թե Վազգեն Սարգսյանը դեմ չէր երգչուհուն կարիերային, եթե ողջ լիներ, կաջակցեր իրեն։
Շեշտել էր, եթե Վազգեն Սարգսյանը ողջ լիներ, ամուսնացած կլինեին։
Այս հարցազրույցից մի քանի ժամ անց Վազգեն Սարգսյանի եղբոր դուստրերը ֆեյսբուքյան էջերում գրեցին, որ դա ապատեղեկատվություն է, եւ, որ իրենց տանը Լիլիթ Կարապետյանի հետ ունեցած մի լուսանկար անգամ չկա։
«Հարգելով բոլորի անձնական կյանքին վերաբերող գաղտնիքները եւ զգացմունքները՝ ամենայն անկեղծությամբ ասում եմ, որ եթե հորեղբորս արխիվում լիներ գեթ մեկ նկար Լիլիթ Կարապետյանի հետ, ես հենց այս պահին այն կհրապարակեի: Տեղեկացնեմ, որ ծանոթ եմ հորեղբորս ամբողջ ֆոտո արխիվին…»:
Զարմուհին՝ Նոնա Սարգսյանն էլ գրել է.
«Ուրեմն հարգելով բոլորի իրավունքները, զգացմունքները եւ սերը՝ ուզում եմ ասել, որ պահեք ձեր երազանքները ձեր ներսում… երազելը վատ բան չի….ինչ վերաբերում ա Վազգենին, Վազգենի սիրած կինը երբեք չէր կարող ինքնառեկլամով զբաղվել՝ Վազգենի անվան հաշվին։ Էդ տեսակի կնոջ Վազգենը երբեք չէր սիրի։ Էլ չեմ խոսում, որ էդ հեքիաթները Վազգենի մահվանից հետո շաբաթական 10 անգամ լսել ենք, ու բոլորը երազանքների ժանրից էր… Իսկ տատիկս, եթե Վազգենը մի աղջկա սիրեր ու էդ աղջիկը 2 գլուխ, 10 ոտք եւ 4 ականջ ունենար, տատիկս պարելով, երջանկությամբ կընդուներ ու միայն ուրախ կլիներ։ Ու վերջում ամոթ է ԱՄՈԹ հերիք եղավ ձեզ ռեկլամ անեք Վազգենի անունը տալով»։