Ղարաբաղյան կարգավորման շուրջ բանակցությունները վաղուց միայն Մադրիդյան սկզբունքների շուրջ են ընթանում. իրավապաշտպան
Ղարաբաղյան կարգավորման շուրջ բանակցությունները վաղուց ընթանում են միայն մադրիդյան սկզբունքների շուրջ, և այլ փաստաթղթեր առայժմ չկան: Այս մասին այսօր` փետրվարի 5-ին, լրագրողների հետ հանդիպման ժամանակ ասաց ՀՀ առաջին օմբուդսմեն, իրավապաշտպան Լարիսա Ալավերդյանը: Նրա խոսքով` որեւէ որոշում կամ ստորագրված փաստաթուղթ չի կարող ազդեցություն ունենալ Ղարաբաղի համար, եթե դա տեղի ունենա առանց իր մասնակցության: Փոխանցում է NEWS.am-ը:
«Ղարաբաղը պետք է հանդես գա իր դիրքերից: Չնայած այն հանգամանքին, որ մեր հիմնական և վերջնական նպատակը Հայաստանի հետ վերամիավորվելն է, ամեն դեպքում, Հայաստանի ղեկավարության պաշտոնական հայտարարություններն այն մասին, որ «Ղարաբաղը Հայաստանն է», այս փուլում, կարծես թե, հող նախապատրաստելու փորձ են թվում, որպեսզի Երևանն ինքնուրույն որոշումներ կայացնի` առանց Ստեփանակերտի մասնակցության»,- ասաց նա:
«Ղարաբաղյան խնդրի վերաբերյալ նախկին իշխանությունների ժառանգությունը որոշակի ձևով ներկայացնելու փորձը կարող է որպես ներկայիս իշխող ուժի կողմից ապագա որոշ գործողություններն արդարացնելու փորձ դիտվել: Բանակցային գործընթացում Հայաստանի գործառույթն է պաշտպանել Ղարաբաղի շահերը, եւ ոչ մի այլ դերում ահնդես չգալ, օրինակ` համեմատել իր ռազմական ներուժը Ադրբեջանի հնարավորությունների հետ: Մեր ուժը կայանում է հասարակության ոգու եւ միասնության մեջ, եւ այժմ մենք այս միասնությունը պառակտելու փորձեր ենք տեսնում: Այս առումով, կարևոր է, որպեսզի որոշ նախարարներ, հայտարարություններ անելիս կամ որոշումներ կայացնելիս, գնահատեն նաև դրա քաղաքական և հասարակական ռեզոնանսը»,- պարզաբանեց իրավապաշտպանը: