Ջազմեն Գարի Քյոսայանը և «Գարի Քյոսայան» անվանի ջազային քառյակը կներկայանան երևանյան համերգով

2020 թվականի մարտի 14-ին Երևանի Արամ Խաչատրյանի անվան ֆիլհարմոնիկ համերգասրահում տեղի կունենա Spring Jazz Vibes  ջազային համերգը «Գարի Քյոսայան» անվանի ջազային քառյակի նախաձեռնությամբ և մի շարք ճանաչված երաժիշտների մասնակցությամբ։

Համերգի հատուկ հյուրն է ամերիկացի հայտնի երաժիշտ, կիթառահար Դարիլ Դարդենը։ Նա իր խմբի անդամները հանդես են եկել այնպիսի աշխարհահռչակ աստղերի հետ, ինչպիսիք են՝ BB King-ը, Stevie Wonder-ը, Albert King-ը, Bobby McFerrin-ը և այլոք։

 ***

Գարի Քյոսայանը Հայաստանի առաջին ջազ նվագողներից է, ով իր ջազային գործունեությունը սկսել է 1973 թվականին՝ ստեղծելով Հայաստանի առաջին ջազ տրիոն։ Գարի Քյոսայանն ունեցել է հարյուրավոր համերգներ աշխարհի տարբեր բեմերում և բազմաթիվ հանրահայտ երաժիշտների հետ միասին։ Նրա ԱՄՆ-ում թողարկված առաջին՝ «Քեզ համար» ձայնասկավառակն արժանացել է «Լավագույն ջազ ալբոմ» և «Լավագույն ջազ երաժիշտ» մրցանակներին։

Գ․Քյոսայաանը հանդիսանում է մի շարք երաժշտությունների հեղինակ, այդ թվում նա 2000 թվականին գրել է Վ․ Չալդրանյանի «Լռության սիմֆոնիա» ֆիլմի երաժշտությունը, 2010 թվականին՝  Ա․Էլբակյանի բեմադրած «Մուսա լեռան 40 օրը», իսկ 2019 թվականին՝ «Թռիչք կկվի բնի վրայով» թատերական ներկայացումների երաժշտությունը, իսկ իր «Ավե Մարիա» ստեղծագործությունն առաջին անգամ հնչել է Հռոմի Պապ Նորին Սրբություն Ֆրանցիսկոսի հայաստանյան այցի առթիվ կազմակերպված  համերգի ընթացքում: