Հանրային պահանջ ձևակերպման տակ կարելի է իրականացնել ցանկացած անարխիա, արդյոք սա՞ է նոր Հայաստանը. Իվետա Տոնոյան
Պարոն Սիմոնյանին հորդորում ենք, թե ինչ ջանասիրությամբ ուսումնասիրում է Գևորգ Պետրոսյանի ֆեյսբուքյան գրառումները, նույն ջանասիրությամբ նաև ուսումնասիրեր պարոն Ծառուկյանի հայտարարությունները, քանի որ դրանից երկու օր առաջ Գագիկ Ծառուկյանն ասել էր, որ ոչ թե խորհրդարանը ցրելու, այլ կառուցողական աշխատելու ժամանակն է: Այս մասին Ազգային ժողովում ճեպազրույցների ժամին ասաց «Բարգավաճ Հայաստան» խմբակցության պատգամավոր Իվետա Տոնոյանը` անդրադառնալով ԱԺ փոխնախագահ Ալեն Սիմոնյանի կողմից Գևորգ Պետրոսյանին «քուանշ» հայտարարելուն: Հաղորդում է Tert.am-ը:
Իսկ «Բարգավաճ Հայաստան» խմբակցության պատգամավոր Արման Աբովյանին խորհուրդ կտամ, որ բլոտի տեղը գոնե պոկեր խաղա:
«Վաղուց արդեն անցել է իշխանությունների փորձաշրջանի ժամանակահատվածը, և վաղուց արդեն եկել է կառուցողական դաշտ տեղափոխվելու ժամանակը: Տեսարաններ միշտ կարելի է ապահովել, ցանկալի ցուցանիշներից միշտ կարելի է խոսել, այդ ցուցանիշները երբեմն կարելի է ջախջախիչ հակահարվածների արժանացնել, օրինակ՝ հարևան պետությունների տարբեր չինովնիկների կողմից, կարծում եմ, որ հարցը պետք է բացառապես կառուցողական դաշտի անհրաժեշտության տեսանկյունից դիտարկել: Ցանկացած գործընթաց բացառապես պետք է իրավական տառի համապատասխանելության ներքո իրականացվեն, ում կողմից էլ դա ուզում է իրականացվի»,-ասաց նա:
Ինչ վերաբերում է «բռնել բաց թողնել» ոստիկանության երեկվա գործողություններին, նա դա տարօրինակ համարեց, ինչպես նաև զարմանալի համարեց Երևանի «Իմ քայլը» խմբակցության ավագանու մեկնաբանությունը, թե դա հանրային պահանջ է: «Հանրային պահանջ ձևակերպման տակ կարելի է իրականացնել ցանկացած անարխիա, արդյոք սա ՞է նոր Հայաստանը, և արդյոք սրան էինք ձգտում»,-ասաց նա:
Արման Աբովյանն էլ ավելացրեց, որ ոչ մեկի խորհուրդ չի տա խաղալ հանրային պահանջ բառերի հետ, քանի որ դրանք ունեն վերադառնալու հատկություն, և հարվածում են հենց այդ թեզը առաջ տանողին: