Հանրայինին գովազդի իրավունք տալու դեպքում իշխանությունները կթուլացնեն մասնավոր հեռուստաընկերությունները. Աղասի Ենոքյան
Հանրային հեռուստաեսությունը սնվում է մեր հարկատուների փողերով և երբ ժամանակին Հանրային ՀԸ-ն վերացրեց գովազդները, նպատակն այն էր, որ հնարավորություն տրվի մասնավոր հեռուստաընկերություններին փող աշխատել: Այս մասին Tert.am-ի հետ զրույցում ասաց «Մեդիա Պաշտպան» նախաձեռնության ղեկավար, քաղաքագետ Աղասի Ենոքյանը՝ անդրադառնալով արդարադատության նախարարության կողմից օրերս շրջանառության մեջ դրված նախագծին, որով նախատեսվում է հնարավորություն տալ Հանրային հեռուստաընկերությանը վճարովի գովազդ ցուցադրել:
«Հիմա անհասկանալի է, թե ինչի համար են ուզոմ վերադարձնել գովազդը, որովհետև կարծես թե ֆինանսավորման պակաս չունի Հանրային հեռուստաընկերությունը: Երբ գովազդը վերադարձնում են, այդ գովազդը բնականաբար մյուս հեռուստաընկերություններից է գնում դեպի Հանրային: Ընդհանուր գովազդային դաշտից է դա պակասում, որովհետև այդ գովազդը ինչ-որ այլ տեղերից չի ավելանալու, դաշտից է գնալու: Սա, իհարկե, լուրջ ազդեցություն կունենա մասնավոր հեռուստաընկերությունների վրա»,- ասաց նա:
Իսկ թե ինչի համար է սա արվում, Ենոքյանն ասաց, որ դեռևս տարվա սկզբին ՀՀ վարչապետ Նիկոլ Փաշինյանը դժգոհում էր, որ իրենք հեռուստաընկերությունների 90 տոկոսի նկատմամբ վերահսկողություն չունեն. «Այս ամբողջ ընթացքում տարբեր միջոցներ են գործադրվել, որպեսզի այդ վերահսկողությունը ստանան: Սրանով, իհարկե, նրանք թուլացնում են մասնավոր հեռուստաընկերությունները և հզորացնում են այն հեռուստաընկերությունը, որի նկատմամբ իրենք ունեն տոտալ վերահսկողություն: Հանրային հեռուստսաընկերություն այսօր, ըստ էության, չկա, դա իշխանական հեռուստաընկերություն է և արտահայտվում է զուտ իշխանության կարծիքը, շահերը»,- շեշտեց նա:
Բացի այդ, ըստ Ենոքյանի, սրանով նպատակ կա մասնավորին դարձնել ավելի քիչ ռեյտինգային: «Եթե մասնավորն աղքատանում է, նա չի կարող լավ հաղորդումներ պատրաստել, եթե չի կարողանում լավ հաղորդումներ պատրաստել, ուրեմն ավելի քիչ մարդ կնայի մասնավոր հեռուստաընկերությունը և, բնականաբար, դիտողները կգնան Հանրային հեռուստաընկերություն»,- ասաց Ենոքյանը:
Աղասի Ենոքյանը չբացառեց, որ նախագծի ընդունման դեպքում կլինեն հեռուստաընկերություններ, որոնք կփակվեն: «Առանց այդ էլ մասնավոր հեռուստաընկերություններից շատերը հազիվ ծայրը ծայրին են հասցնում, և եթե թեկուզ իրենց գովազդից պակասի 10 կամ 20 տոկոս, սա իրենց համար կարող է ունենալ աղետալի նշանակություն»,- շեշտեց բանախոսը: