Եթե Մամեդյարովի հայտարարությունը իրականություն է, ապա մենք լուրջ մտահոգվելու առիթ ունենք
«Հաղթանակած» նախաձեռնության համահիմնադիր Հովհաննես Հարությունյանն իր ֆեյսբուքյան էջում գրել է․
Ադրբեջանի ԱԳ նախարարը իր վերջին հարցազրույցի ընթացքում բացել է փակագծեր բանակցային գործընթացում տեղի ունեցող իրադարձություններից, մասնավորապես նշել է.
«Հայկական կողմը վերջին շրջանում բանակցային սեղանին է դնում տարբեր փաստաթղթեր, որոնցից վերջինը «Լավրովի պլանն» է, որը ենթադրում է Արցախի հիմնահարցի կարգավորման փուլային լուծում։
Ի՞նչ է ենթադրում փուլային լուծումը։
Առաջին փուլում նախատեսվում է հայկական զորքերի ամբողջական դուրս բերում Արցախի տարածքներից, այնուհետև Ադրբեջանի «Արցախյան» համայնքի վերաբնակեցում, անվտանգության ապահովում, կոմունիկացիաների հաստատում»։
Եթե Մամեդյարովի հայտարարությունը համապատասխանում է իրականությանը, ապա մենք լուրջ մտահոգվելու առիթ ունենք, քանի որ այս տարբերակով լուծումը վերջ կդնի Արցախի ժողովրդի ինքնորոշման իրավունքի ու Արցախի Հանրապետության անկախության ճանաչմանը։ Եթե ոչ, ապա խնդրում և պահանջում եմ ՀՀ ԱԳՆ-ից պաշտոնական հերքում տարածել` փաստաթղթի բանակցային գործընթացից բացառման վերաբերյալ։
Հիշեցնենք, որ ավելի վաղ Ադրբեջանի արտգործ նախարար Մամեդյարովը հայտարարել էր, որ «Լավրովի պլանը» շուրջ երկու տարի առաջ տեղի ունեցած բանակցությունների արդյունք է. այն հիմնված է Մադրիդյան սկզբունքների վրա և ենթադրում է փուլային տարբերակ: Առաջին փուլում տեղի կունենա հայկական զորքերի դուրսբերում մեր տարածքներից, հետո անվտանգության հաստատում, կոմունիկացիաների հաստատում: