Փաշինյանական Հայաստանը մնալու է «06»-ի ու «գազ-31»-ի հույսի՞ն
«... Չի կարելի ստանդարտից դուրս ստեղծագործական աշխատանքն անվանել սատանիզմ...»: Այս մասին երեկ երեկոյան ֆեյսբուքյան ուղիղ եթերի ժամանակ ասաց ՀՀ վարչապետ Նիկոլ Փաշինյանը՝ անդրադառնալով վերջին օրերին լայն քննարկման առարկա դարձած «ՀուԶանք ու Զանգ» ֆուտուրիստական միջոցառմանը:
Ավելին, նա փորձեց այդ միջոցառումը յուրօրինակ պաշտպանել` բերելով համեմատությունը նախկինում «06»-ի հանդեպ կաղապարված վերաբերմունքի վերաբերյալ:
«... Մինչև 90-ականների կեսերը Հայաստանում շատ մարդիկ մտածում էին, թե «06»-ը աշխարհի ամենալավ ավտոմեքենան է, կային մարդիկ, որոնց հետ հնարավոր չէր այս թեմայով վիճել։ «06»-ի մասին մի բան ասեիր՝ կթշնամանային հետդ, կասեին՝ դու ո՞վ ես արա, որ «06»-ին բան ես ասում, «06»-ի նման ավտո կա՞ երկրագնդի վրա. Էդ ի՞նչ են էդ պլաստմասե թղթերը, մեքենան պիտի «24»-ի նման լինի, որ 5 տոննա չուգունը վրեն լինի՝ տեղից չկարողանա շարժվել։ Ես էլ եմ ժամանակին այդպես մտածել։ Ես ունեցել եմ «06»։ Իմ պատկերացումը փոխվեց, 2000-ականներն էր, Շահումյանի արձանի դիմաց՝ հրապարակում վթար էր տեղի ունեցել, «TOYOTA» և «ГАЗ-31» մակնիշներն էին բախվել։ Տեսա, որ «TOYOTA»-ն թեթև վնասվել էր, իսկ «ГАЗ-31»-ը ճզմվել էր. դա ինձ համար մշակութային շոկ էր...»,- վերջում եզրակացրեց «ժողովրդի» վարչապետը:
Այսպիսով` Փաշինյանը փորձում էր ցույց տալ, որ չի կարելի կաղապարներով մտածել նոր երևույթների մասին, բերելով նաև իր փորձից:
Բացի այդ Փաշինյանը իր այս մոտեցմամբ փորձում էր ցույց տալ, որ ինքը «ամենանորի» կողմ է, քանզի մերժում է բոլոր տեսակի «հնամաշ» պատկերացումները:
Սակայն այս մեծ աղմուկից հետո իշխանությունները որոշել են դադարել աջակցել այս «նորարարներին», որպեսզի հանրության մեծ մասի զայրույթի և համբերության բաժակը չլցվի:
Ստացվում է, ըստ Փաշինյանի, որ «նոր» Հայաստանը արժեքների մասով «շարունակելու է մնալ «06»-ի հույսին և այլևս մերսեդեսներ չի տեսնելու»:
Բա ո՞ւր մնաց Ձեր խոստումը, պարոն վարչապետ, կաղապարներից դուրս նոր Հայաստան կերտելը:
Սակայն իշխանությունների համար կարող է գործել այս պարագայում չկա չարիք առանց բարիքի հայտնի սկզբունքը: Հանրության այս արձագանքից հետո Փաշինյանը հետագայում կհիմնավորի, որ «... Հայաստան ներդրումներ չեն գալիս, որոհետև երկրում արժեքային հեղափոխություն չի կատարվել...»:
Չե՞ք հավատում: Մենք էլ չէինք հավատում, բայց ՍԴ-ի դեմ պայքարում Փաշինյանն ու իր կողմնակիցները հենց այդ հիմնավորումն էին բերում:
Այնպես որ երկրում փաշինյանական փոփոխությունների դեմ պայքարող մտավորականությունը շուտով նույնպես հայտնվելու է «հակահեղափոխական» դասի մեջ, քանզի խոչնդոտում է, որ երկրում իրականանա «տնտեսական հեղափոխություն»:
Սա է իրականությունը:
Դավիթ Մկրտչյան