«Հայաստանը որևէ բանակցություն չի վարում մեր երկրի տարածքում երրորդ երկրի զինծառայողների տեղակայման հարցով». Աննա Նաղդալյան
«Հայաստանը որևէ բանակցություն չի վարում մեր երկրի տարածքում երրորդ երկրի զինծառայողների տեղակայման հարցով»,- այսօր լրագրողների հետ հանդիպմանն ասաց ՀՀ ԱԳՆ մամուլի քարտուղար Աննա Նաղդալյանն՝ անդրադառնալով օրերս Սերգեյ Լավրովի հայտարարությանն, ըստ որի Մոսկվան և Երևանն ավարտում են փաստաթղթի նախապատրաստումը, որը երաշխավորելու է Հայաստանի կենսաբանական լաբորատորիաներում օտարերկրյա զինծառայողների բացակայությունը:
«Այս հարցով հստակ կարող եմ ասել, որ սանիտարահամաճարակային վերահսկողության ոլորտը հայ-ռուսական համագործակցության մի մաս է կազմում ու այդ հարցի շուրջ կա երկխոսություն: Ինչ վերաբերում է կենսաբանական լաբորատորիաներին, պետք է վերահաստատել, որ դրանք Հայաստանինն են, այնտեղ աշխատում են բացառապես հայ մասնագետներ ու դրանք ունեցել են, ունեն և կունենան բացառապես քաղաքացիական բնույթ», - ասաց Աննա Նաղդալյանը:
Ճշտող հարցին՝ կա՞ քննարկում օտարերկրյա զինծառայողների հարցի շուրջ, ԱԳՆ մամուլի քարտուղարն արձագանքեց.
«Լաբորատորիաները քաղաքացիական բնույթ ունեն, Հայաստանի պարագայում ռազմական ներկայության խնդիր չկա, միաժամանակ պետք է ասեմ, որ Հայաստանը որևէ բանակցություն չի վարում մեր երկրի տարածքում երրորդ երկրի զինվորների տեղակայման հարցով»:
«Պետք է արձանագրենք, որ այն, ինչ ոմանց համար բիզնես է, մեզ համար մահացու գործիք է: ԱԳՆ-ն մշտապես իր օրակարգում է պահում տարածաշրջանում սպառաինությունների մրցավազքի կանխարգելման օրակարգը»,- ասացՀՀ ԱԳՆ մամուլի քարտուղար Աննա Նաղդալյանն՝ անդրադառնալով Ադրբեջանին զենքի վաճառքի վերաբերյալ Բելառուսի նախագահի հայտարարությանը:
Նա նշեց՝ այս հայտարարություններին արդեն տրվել են արձագանքներ:
«ԱԳՆ անունից կարող եմ ավելացնել, որ սպառազինության մրցավազքն ուղղակիորեն հանգեցնում է անկայունության աճին: Մեզ համար սկզբունքային դիրքորոշում է, որ սպառազինությունների մրցավազքը տարածաշրջանում պետք է կանխվի», - ասաց Աննա Նաղդալյանը:
Նա ընդգծեց՝ այս հայտարարությունը չպետք է շփոթել կարողությունների կամ վճռականության պակասի հետ:
«Մենք վստահ կարող ենք ասել, որ ՀՀ Զինված ուժերն ունեն բարձր պատասխանատվություն ու կարողություն՝ երաշխավորելու Հայաստանի ու Արցախի անվտանգությունը: Պարզապես մենք գիտակցում ենք տարածաշրջանում լարվածության աճի հետևանքները», - ասաց Աննա Նաղդալյանը:
Նա հավելեց, որ 2018թ. մայիսից ՀՀ ԱԳ նախարարի պաշտոնում նշանակվելուց հետո մինչ օրս Զոհրաբ Մնացականյանը կատարել է 23 աշխատանքային և պաշտոնական այցեր, այսօր լրագրողների հետ հանդիպմանն ասաց ԱԳՆ մամուլի քարտուղար Աննա Նաղդալյանն՝ ամփոփելով անցնող տարին:
«Զոհրաբ Մնացականյանն այս ընթացքում ունեցել է մոտ 150 հանդիպումներ, որոնցից 53-ն արտաքին գործերի նախարարների հետ, 10-ը՝ միջազգային կառույցների ղեկավարների», - ասաց Աննա Նաղդալյանը:
Zham.am