Իմ կողքին չի եղել ու չի կարող լինել որևէ քրեական տարր, ես ընտրություններին վարչական ռեսուրս չեմ կիրառել. Լոռու մարզպետ
Լոռու մարզպետ Անդրեյ Ղուկասյանը, ով նաև «Իմ քայլը» դաշինքի ռեյտինգային թեկնածու է, Վանաձորի 23/29 ընտրատեղամասում կատարեց իր ընտրությունը։
Նա լրագրողների հետ զրույցում նշեց, որ այս ընտրություններին եկել է բարձր տրամադրությամբ։ «Այս անգամ քվեարկել եմ հանուն հզոր պետության, հանուն հզոր ապագայի, երջանիկ անհատի, հանուն հոգատար հանրության, հանուն հեղափոխության հաղթանակի ու արժեքների պահպանման»,- ասաց նա։
Վերջինս այս ընտրության ամենակարևոր իմաստն այն է համարում, որ քաղաքացին իր կամքն արտահայտելու է ազատ ու արդար. «Ճիշտ է՝ սա ԱԺ ընտրություն է, բայց այս ընտրություններով մենք ձևավորում ենք ամբողջ իշխանությունները, հետևաբար մենք՝ որպես թիմի անդամ, այս ընտրություններին մասնակցում ենք թիմով։ Թե հետագայում ով որտեղ կլինի, կորոշի թիմն ընտրություններից հետո»,-ընդգծեց Ղուկասյանը։
Դիտարկմանը, թե լուրեր կան, որ ձեզ աջակցել են քրեական տարեր, որոնք այս պահին բանտում են, Ղուկասյանը հերքեց. «Իմ կողքին չի եղել ու չի կարող լինել որևէ քրեական տարր։ Ես կիրառել եմ զրո վարչական ռեսուրս»,֊շեշտեց Լոռու մարզպետը։
Zham.am