Ինչպես են Դավիթ Շահնազարյանին հրավիրել ԱԱԾ
Ինչպես արդեն հայտնել ենք, ՀՀԿ նախընտրական ցուցակի երրորդ համարը զբաղեցնող Դավիթ Շահնազարյանին ԱԱԾ-ն հրավիրել է բացատրություն տալու:
Շահնազարյանը, սակայն, ԱԱԾ գնալու փոխարեն ՀՀԿ կենտրոնական շտաբում մամուլի ասուլիս էր հրավիրել, որտեղ պատմեց եղելությունը:
Նա պատմեց, որ երեկ երեկոյան ժամը 21։45-ի սահմաններում զանգ է ստացել, զանգողը ներկայացել է որպես ԱԱԾ աշխատակից, և ասել, որ պատրաստ է Շահնազարյանին հանդիպել այնտեղ, որտեղ գտնվում է վերջինս, քիչ անց սրճարան են մոտեցել երկու անձ, ցույց են տվել վկայականները՝ թուղթ են հանձնել, որտեղ նշված էր, որ Շահնազարյանը առավոտյան ժամը 10։00 հրավիրվում է ԱԱԾ: Շահնազարյանն էլ նշել է, որ ժամը 10-ին զբաղված է և ԱԱԾ կգնա 13:00-ին։
Շահնազարյանի դիտարկմամբ՝ սա քաղաքական հետապնդում է, որի հրամանը տվել է Նիկոլ Փաշինյանը:
«Փաստաթղթում գրված է, որ մամլո ասուլիսին ես հայտարարություններ եմ արել, որ ներկայիս կառավարությունը իր պարագլուխ Նիկոլ Փաշինյանի գլխավորությամբ իրականացնում է դավադրություն Արցախի դիմաց։ Հիմա էլ մեկ անգամ եւս հայտարարում եմ, որ ներկայումս նույն քաղաքականությունն է իրականացնում, ես իրավական գնահատական առայժմ չեմ տալիս, ես քաղաքական գնահատական եմ տալիս»,-հայտարարեց Դավիթ Շահնազարյանը:
Անդրադառնալով երեկ Սասուն Միքայելյանի վերաբերյալ հնչեցրած հայտարարություններին՝ Շահնազարյանը ասաց, որ Սասունը, ինչպես Նիկոլ Փաշինյանը, ստախոս է՝ հավելելով՝
«ԱԱԾ-ն այն տեղը չէ, որտեղ ես քննարկելու եմ Արցախի հետ կապված հարցերը, ես դա անելու եմ հրապարակայնորեն»:
Zham.am