«Աշխարհը չափազանց շատ է հապաղում». ավստրալացի պատգամավորները կոչ են արել ճանաչել Հայոց ցեղասպանությունը (տեսանյութեր)
Դեկտեմբերի 3-ին Ավստրալիայի խորհրդարանի Ներկայացուցիչների պալատում տեղի է ունեցել Ցեղասպանության կանխարգելման ու դրա համար պատժի մասին ՄԱԿ-ի հռչակագրի ընդունման 70-ամյակին նվիրված քննարկում, որի շրջանակում մի խումբ պատգամավորներ խոսել են Հայոց ցեղասպանության մասին:
Ինչպես հաղորդում է Ավստրալիայի Հայ դատի գրասենյակի պաշտոնակայն կայքը, Հայոց ցեղասպանությունը որպես պատմական փաստ ճանաչելու կոչով է հանդես եկել յոթ պատգամավոր՝ հայկական արմատներ ունեցող Թիմ Ուիլսոնը և նրա գործընկերներ Քրիս Հայեսը, Ջուլիան Լիսերը, Ջեյսոն Ֆալինսկին, Մայքլ Սուքարը, Մայքլ Դանբին, Թոնիա Զապիան:
Օրենսդիրներն իրենց խոսքում ընդգծել են, որ Ավստրալիան՝ որպես այդ հռչակագիրը վավերացրած առաջին պետություններից մեկը, պետք է ճանաչի Հայոց ցեղասպանությունը:
«Ես՝ որպես Ավստրալիայի խորհրդարանի Ներկայացուցիչների պալատի միակ հայազգի անդամ, շարունակում եմ խորապես հիասթափված մնալ այն փաստից, որ մեր խորհրդարանը լիարժեք չի ճանաչել հայ ժողովրդի դեմ իրագործված ցեղասպանության սարսափն ու ողբերգությունը», -ասել է Ուիլսոնը՝ ընդգծելով, որ միջազգային հանրության դատապարտումն ապագայում այդօրինակ ոճիրները կանխելու միակ միջոցն է:
Մինչդեռ պատգամավոր Լիսերը նշել է, որ «աշխարհը չափազանց շատ է հապաղում Հայոց ցեղասպանության ճանաչման հարցում»:
«Ժամանակն է, որ աշխարհի յուրաքանչյուր ազգ, այդ թվում նաև մենք, ընդունենք, որ կատարվածը ցեղասպանություն է: Ժամանակն է, որ Էրդողանի ռեժիմն առերեսվի սեփական պատմությանը»,-շարունակել է պատգամավորը:
Նա ընդգծել է, որ սպանված 1,5 մլն հայերին «պատերազմի զոհեր» անվանելը շատ սխալ է, քանի որ կատարվածն ունի հստակ իրավական սահմանում՝ ցեղասպանություն:
Լիսերը հիշեցրել է, որ ժամանակին ֆաշիստական Գերմանիայում նույն ձևակերպումն էին տալիս նաև հրեաների Հոլոքոստին:
Հիշեցնենք, որ երեկվա քննարկված փաստաթուղթը հարգանքի տուրք է մատուցում ցեղասպանության վերաբերյալ ՄԱԿ-ի հռչակագրի հեղինակ Ռաֆայել Լեմկինին՝ ընդգծելով, որ «հենց Հայոց ցեղասպանությունն ու Հոլոքոստն են դարձել այն գործոնները, որոնք դրդել են զանգվածային սպանությունների այդ տեսակին իրավական սահմանում տալ»:
«Ներկայացուցիչների պալատը հարգանքի տուրք է մատուցում հռչակագրի հեղինակ-նախաձեռնող, փաստաբան Ռաֆայել Լեմկինի հիշատակին: Նա «ցեղասպանություն» եզրույթը ստեղծել է Առաջին աշխարհամարտի ընթացքում հայերի և Երկրորդ աշխարհամարտի ընթացքում հրեաների կանոնավոր բնաջնջումների պատմություններն ուսումնասիրելուց հետո»,-ասվում է փաստաթղթում: